পৰিষ্কাৰ বনভোজ স্থলী; মুকাভিনয়েৰে জনসাধাৰণৰ মাজত সজাগতা সৃষ্টিৰ লক্ষ্যৰে সাজু শিল্পীৰ দল

শীতকাল আৰম্ভ হোৱাৰ লগে লগে অসমত বনভোজৰ বতৰ আৰম্ভ হৈছে। বনভোজৰ সময়ত বহু লোকে প্ৰকৃতিৰ সুন্দৰ কোলাত প্ৰতিপালিত হোৱা বনভোজ স্থানসমূহ লেতেৰা কৰা পৰিলক্ষিত হৈ আহিছে।

বিগত বৰ্ষৰ অসমৰ এটা মুকাভিনয়ৰ দলে বনভোজ স্থল সমূহ পৰিষ্কাৰ কৰি ৰখাৰ বাবে মুকাভিনয়েৰে অভিনৱ প্ৰয়াস চলাইছিল।

বিগত বৰ্ষৰ দৰে এইবেলিও মুকাভিনয়ৰ দলটোৱে বনভোজলৈ ওলোৱা লোকসকলৰ মাজত মুকাভিনয়ৰ মাধ্যমেৰে সজাগতা সৃষ্টিৰ বাবে সাজু হৈছে।

#ChaloPicnicDhyanSe শীৰ্ষক শ্লোগানেৰে মুকাভিনয়ৰ দলটোৱে জনসাধাৰণৰ মাজত সজাগতা সৃষ্টিৰ প্ৰয়াস কৰিব।

‘‘পিকনিকৰ বতৰ আৰম্ভ হৈছে।  এই সময় খিনিত কিছু সাৱধানতা লোৱাৰ প্ৰয়োজন সেই হেতুকে সজাগতা অনাৰ লক্ষ্যৰে এই সজাগতা অভিযান চলোৱা হৈছে। পৰিবেশ  সংৰক্ষণ, স্বচ্ছতাৰ কথা আমি কৈ থাকোঁ কিন্তু হাতে-কামে  খুব কমকৈ কাম কৰোঁ । পিকনিকৰ সময়ছোৱাত আমি নদী, জান , জুৰি ইত্যাদি বা পিকনিক খোৱা ঠাইটুকুৰা লেতেৰা কৰি থৈ আহো। নদীলৈ পলিথিন, প্লাষ্টিকৰ বটল, সুৰাৰ বটল ইত্যাদি দলিয়াই আমিয়েই সাংঘাতিক ধৰণে প্ৰদূষণত অৰিহণা যোগাই আহোঁ,’’ মুকাভিনয় দলটোৰ এগৰাকী শিল্পীয়ে কয়।

বিগত বৰ্ষত মুকাভিনয়ৰ দলটোৱে গুৱাহাটীৰ দীপৰ বিলত মুকাভিনয়েৰে জনসাধাৰণৰ মাজত সজাগতা অভিযান চলাইছিল।