শিৱসাগৰত মন্ত্ৰী হিমন্ত বিশ্বৰ নিৰ্বাচনী টোপ! : বিবেকানন্দ যুৱ সৱলীকৰণ যোজনাৰ স্বয়ম আঁচনিৰ অনুমোদন পত্ৰ বিতৰণ

শিৱসাগৰ জিলাৰ বিবেকানন্দ যুৱ সৱলীকৰণ যোজনাৰ স্বয়ম আঁচনিৰ বাবে নিৰ্বাচিত হিতাধিকাৰীক অনুমোদন পত্ৰ বিতৰণ কৰে অসম চৰকাৰৰ মন্ত্ৰী ডঃ হিমন্ত বিশ্ব শৰ্মাই।

শিৱসাগৰৰ ব’ৰ্ডিং খেলপথাৰত অনুষ্ঠিত এক অনুষ্ঠানত হিতাধিকাৰীসকলৰ মাজত স্বয়ম আঁচনিৰ অনুমোদন পত্ৰ বিতৰণ কৰে ৰাজ্যৰ প্ৰভাৱশালী মন্ত্ৰীগৰাকীয়ে।

স্বামী বিবেকানন্দ যুৱ সৱলীকৰণ যোজনা নৱ ৰূপত স্বয়ম আঁচনিৰ প্ৰথম কিস্তি হিচাপে নিৰ্বাচিত আত্মসহায়ক গোটসমুহত ত্ৰিশ হাজাৰ টকাকৈ প্ৰদান কৰা হৈছে। পৰৱৰ্তী সময়ত বাকী থকা বিশ হাজাৰ টকা প্ৰদান কৰা হ’ব বুলি ঘোষণা কৰে মন্ত্ৰী হিমন্ত বিশ্ব শৰ্মাই।

এই স্বয়ম আঁচনিৰ জৰিয়তে শিৱসাগৰৰ প্ৰায় ১০ হাজাৰ যুৱক যুৱতী উপকৃত হ’ব বুলি মন্তব্য কৰে মন্ত্ৰীগৰাকীয়ে।

নিজৰ ভাষণ প্ৰসংগত মন্ত্ৰীগৰাকীয়ে কয়, অসমৰ সাংস্কৃতিক ৰাজধানী তথা প্ৰাণকেন্দ্ৰ হিচাপে শিৱসাগৰক আগুৱাই নিয়াৰ বাবে এক নতুন পৰিকল্পনা লোৱা হৈছে।

তেওঁ কয়, শিৱসাগৰৰ নাট্য মন্দিৰৰ বাবে ১ কোটি টকা প্ৰদান কৰা হ’ব, জেৰেঙা পথাৰৰ ১০০ বিঘা মাটি সংৰক্ষণ কৰি তাত জয়মতী স্মৃতি প্ৰকল্প নিৰ্মাণ কৰা হব। শিৱসাগৰৰ যান-জঁটৰ সমস্যা সমাধানৰ বাবে নতুন বাইপাচ ৰাস্তা এটাৰ কথা চিন্তা চৰ্চা কৰা হৈছে বুলি ঘোষণা কৰে মন্ত্ৰী গৰাকীয়ে।

ইয়াৰোপৰি তেওঁ কয়, শিৱসাগৰৰ পৰা সোণাৰী যোৱা পথটি অসম মালা আঁচনিৰ অধীনত চাৰিলেনযুক্ত পথ হিচাপে নিৰ্মাণ কৰা হ’ব। এই আঁচনি অহা ৭ ফেব্ৰুৱাৰীত দেশৰ প্ৰধানমন্ত্ৰী নৰেন্দ্ৰ মোডীয়ে উদ্বোধন কৰিব বুলি কয় মন্ত্ৰীগৰাকীয়ে।

আনহাতে আগন্তুক বিধান সভা নিৰ্বাচনত বিজেপিক প্ৰতিহত কৰিবলৈ গৌৰৱ গগৈয়ে অখিল গগৈ আৰু লুৰিণজ্যোতি গগৈ এই তিনি গগৈ একলগ হ’ব লাগিব বুলি কৰা মন্তব্যত মন্ত্ৰী হিমন্ত বিশ্ব শৰ্মাই কয়, তেওঁলোকক তিনি গগৈক দি দিছো আৰু অসমৰ বাকী গগৈসকলক আমি আমাৰ লগত ৰাখিছো।