বিহু কমিটিৰ বিৰুদ্ধে গোচৰ তৰাৰ ভাবুকি নিৰ্বাচনত হাজাৰ হাজাৰ জনতাক পিছত ঘূৰাই ফুৰা মন্ত্ৰী হিমন্তৰ
নিৰ্বাচনৰ সময়ত হাজাৰ হাজাৰ জনতাক সমবেত কৰাৰ লগতে নিজৰ পিছে পিছে দৌৰাই ফুৰা ৰাজ্যৰ স্বাস্থ্য মন্ত্ৰীগৰাকী নিৰ্বাচন শেষ হোৱাৰ পিছতে কোভিড প্ৰটক’ল সম্পৰ্কে হুঁচ অহাৰ পৰিলক্ষিত হৈছে।
নিৰ্বাচনৰ পূৰ্বে কোভিডভিতিলৈ কেৰেপ নকৰা মন্ত্ৰী হিমন্ত বিশ্বৰ শৰ্মাৰ চলিত বিহুৰ সময়ত হঠাতে যেন কোভিডভিতিত সন্ত্ৰস্ত হৈ পৰিছে।
আজি তেনে এক ইংগিতকে বহন কৰি স্বাস্থ্য মন্ত্ৰীগৰাকীয়ে বিহু কমিটিসমূহলৈ এক কাঢ়া সতৰ্ক বাণী প্ৰেৰণ কৰিছে।
মন্ত্ৰীগৰাকীয়ে আজি কয় যে ১১.৩০ বজাৰ পিছতো যিসমূহ বিহু কমিটিয়ে বিহু বন্ধ নকৰি বিহুৰ বিভিন্ন ধৰণৰ কাৰ্যসূচী অব্যাহত ৰাখিব সেইসমূহ বিহু সমিতিয়ে আগন্তুক তিনি চাৰি বছৰলৈ আদালতলৈ দৌৰি থাকিবলৈ সাজু হৈ থাকিব লাগিব।
অৰ্থাৎ মন্ত্ৰীগাৰাকীয়ে নিশা ১১.৩০ বজাৰ পিছলৈ বিহু উদযাপন কৰি থকা সকলো বিহু কমিটিৰ বিৰুদ্ধে গোচৰ ৰুজু কৰাৰ হুংকাৰ প্ৰদান কৰিছে।
“আইন নমনা বিহু সমিতি সমূহৰ বিৰুদ্ধে এজাহাৰ দাখিল কৰা হ’ব। টিভিত ১১:৩০ বজাৰ পাছত যাকে দেখা যায় সকলোৰে বিৰুদ্ধে গোচৰ ৰুজু হ’ব।” বিহু কমিটিসমূহক উদ্দেশ্যি মন্ত্ৰী শৰ্মাই এইদৰে কয়।
অৱশ্যে বিহুৰ সময়ত কঠোৰ হোৱা নাই বুলিও মন্তব্য কৰিছে মন্ত্ৰী শৰ্মাই। সকলো বিহু কমিটিক আইন মানি চলি ১১ বজাৰ ভিতৰত বিহু শেষ কৰিবলৈ আহ্বান জনায়। অৰ্থাৎ নিয়ম মালি চলা বিহু কমিটিৰ বিৰুদ্ধে নৰম হোৱাৰ ইংগিতো প্ৰদান কৰিছে মন্ত্ৰীগৰাকীয়ে।
উল্লেখ কৰিব লাগিব যে যোৱা ৬ এপ্ৰিলৰ পাছৰ পৰাহে মন্ত্ৰী হিমন্ত বিশ্ব শৰ্মা কোভিডক লৈ অধিক চিৰিয়াছ হোৱা পৰিলক্ষিত হৈছে। নিৰ্বাচন অনুষ্ঠিত হোৱাৰ সময়ত যিগৰাকী মন্ত্ৰীয়ে অসমত মাস্ক পিন্ধাৰ প্ৰয়োজন নাই বুলি দাবী কৰিছিল সেই মন্ত্ৰীগৰাকী হঠাৎ বিহু কমিটিৰ বিৰুদ্ধে কঠোৰ হোৱা বিষয়টোৱে বিশেষ তাৎপৰ্য বহন কৰিছে।
যি হিমন্ত বিশ্ব শৰ্মাই এটা সময়ত হাজাৰ হাজাৰ জনতা লৈ সভা সমিতি অনুষ্ঠিত কৰিলে বা কোভিডৰ সংক্ৰমণৰ কথা চিন্তা নকৰিলে সেই মন্ত্ৰীজন হঠাৎ কোভিড প্ৰট’কলক লৈ তৎপৰ হৈ পৰাত ৰাজ্যৰ সচেতন মহলে মিশ্ৰিত প্ৰকিক্ৰিয়া প্ৰকাশ কৰা দেখা গৈছে।