গোলাঘাটৰ অসম-নাগালেণ্ড সীমান্তত উত্তপ্ত পৰিস্থিতি! ONGC-ৰ ষ্টেচন বন্ধ কৰাৰ ভাবুকি

গোলাঘাট জিলাৰ উৰিয়ামঘাটত নাগালেণ্ড প্ৰশাসনে তেল আৰু প্ৰাকৃতিক গেছ নিগমৰ এটা ড্ৰিলিং ষ্টেচন বন্ধ কৰাৰ ভাবুকি দিয়াৰ খবৰ ওলোৱাৰ পাছতে বুধবাৰে অসম-নাগালেণ্ড সীমান্তত উত্তেজনাৰ সৃষ্টি হৈছে।

অভিযোগ অনুসৰি, নাগালেণ্ড আৰক্ষীৰ এটা দল আৰু এজন দণ্ডাধীশে অসমৰ ভূখণ্ডত প্ৰৱেশ কৰি সেই স্থানত তেল নিষ্কাশনৰ কাম শীঘ্ৰে বন্ধ কৰাৰ দাবী জনায়। কেন্দ্ৰীয় সংৰক্ষিত আৰক্ষী বাহিনী (চি আৰ পি এফ) আৰু কেন্দ্ৰীয় ঔদ্যোগিক নিৰাপত্তা বাহিনী (চি আই এছ এফ)ৰ জোৱান উপস্থিত থকাৰ পাছতো তেওঁলোকে অ’ এন জি চিৰ বিষয়াসকলক অভিযান বন্ধ কৰিবলৈ হেঁচা প্ৰয়োগ কৰা বুলি জানিব পৰা গৈছে।

দণ্ডাধীশৰ সৈতে নাগালেণ্ড আৰক্ষীৰ দলটোৱে উৰিয়ামঘাট অঞ্চলত অ’এনজিচিৰ দ্বাৰা পৰিচালিত খুৰাঘাট আৰু হালধিবাৰীকে ধৰি কেইবাটাও তৈলখাদ পৰিদৰ্শন কৰা বুলি জানিব পৰা গৈছে। নাগালেণ্ড প্ৰশাসনৰ হস্তক্ষেপৰ পাছত এতিয়া স্থানত থকা শ্ৰমিক আৰু বিষয়াসকলে নিৰাপত্তাজনিত উদ্বেগ বৃদ্ধিৰ সন্মুখীন হৈছে।

সদৌ অসম ছাত্ৰ সন্থাই এই ভাবুকিক গৰিহণা দি অসমৰ সাৰ্বভৌমত্বক ভেঙুচালি কৰা  কাৰ্য বুলি অভিহিত কৰিছে।