কেলিফৰ্ণিয়াত ১৪৯ মিলিয়ন ডলাৰৰ স্বাস্থ্যসেৱা জালিয়াতিৰ অপৰাধত গ্ৰেপ্তাৰ অসমৰ তন্ময় শৰ্মা

কেলিফৰ্ণিয়াত স্বাস্থ্যসেৱা জালিয়াতিৰ অভিযোগত গ্ৰেপ্তাৰ হৈছে অসমৰ তন্ময় শৰ্মা। ছ’ভাৰেইন হেল্থ গ্ৰুপৰ প্ৰতিষ্ঠাপক শৰ্মাই ২০১৪-২০২০ চনত প্ৰৱঞ্চনামূলকভাবে বীমা দাবী আৰু অবৈধ পাৰিশ্ৰমিকৰ জৰিয়তে এই জালিয়াতি চলাইছিল বুলি জানিব পৰা গৈছে।

আগশাৰীৰ নিচামুক্তকৰণ চিকিৎসা প্ৰদানকাৰী প্ৰতিষ্ঠান ছ’ভাৰেইন হেল্থ গ্ৰুপৰ প্ৰতিষ্ঠাপক তথা প্ৰাক্তন মুখ্য কাৰ্যবাহী বিষয়া শৰ্মাক ২৯ মে’ত লছ এঞ্জেলছ আন্তঃৰাষ্ট্ৰীয় বিমানবন্দৰত গ্ৰেপ্তাৰ কৰা হৈছিল।

প্ৰাপ্ত তথ্য অনুসৰি ২০১৪ চনৰ পৰা ২০২০ চনৰ ভিতৰত ১৪৯ মিলিয়ন ডলাৰৰ অধিক প্ৰৱঞ্চনামূলক বীমাৰ দাবী দাখিল কৰাৰ অভিযোগত বৰ্তমান আমেৰিকাৰ কেলিফৰ্ণিয়াত থকা অসমৰ টনময় শৰ্মাক গ্ৰেপ্তাৰ কৰা হৈছে।

কেলিফৰ্ণিয়াৰ কেন্দ্ৰীয় জিলাৰ, আমেৰিকাৰ এটৰ্নী কাৰ্যালয়ে প্ৰকাশ কৰা এক বিবৃতি অনুসৰি অভিযোগনামাত উল্লেখ কৰা হৈছে যে শৰ্মাই স্বাস্থ্যসেৱা জালিয়াতিৰ এক বিস্তৃত আঁচনিৰ পৰিকল্পনা কৰিছিল, অপ্ৰয়োজনীয় প্ৰস্ৰাৱ পৰীক্ষাকে ধৰি স্বাস্থ্য বীমা কোম্পানীসমূহক ১৪৯ মিলিয়ন ডলাৰৰ অধিক প্ৰৱঞ্চনামূলকভাবে বীমা দাবী দাখিল কৰিছিল আৰু ৰোগীক তেওঁৰ স্বাস্থ্য কেন্দ্ৰলৈ প্ৰেৰণ কৰিবৰ বাবে ২ কোটি ১০ লাখ ডলাৰতকৈ অধিক উৎকোচ দিছিল।

ইয়াৰোপৰি তেওঁৰ বিৰুদ্ধে চাৰিটা ইলেক্ট্ৰনিক জালিয়াতিৰ গোচৰ, ষড়যন্ত্ৰৰ এটা গোচৰ আৰু তেওঁৰ চিকিৎসা কেন্দ্ৰলৈ প্ৰেৰণ কৰাৰ বাবে অবৈধ পাৰিশ্ৰমিক দিয়াৰ তিনিটা অভিযোগ উত্থাপন কৰা হৈছে।

উল্লেখ্য যে বৰ্তমান কেলিফৰ্ণিয়াৰ টাষ্টিনৰ বাসিন্দা শৰ্মাৰ মূল ঘৰ গুৱাহাটীৰ বামুণীমৈদামত। তেওঁ প্ৰয়াত ফণী শৰ্মাৰ জ্যেষ্ঠ পুত্ৰ তথা অনুৰাধা চিনেমা হলৰ স্বত্বাধিকাৰী চিন্ময় শৰ্মাৰ জ্যেষ্ঠ ভাতৃ।

তেওঁ দোষী সাব্যস্ত হ’লে প্ৰতিটো ইলেক্ট্ৰনিক জালিয়াতিৰ গোচৰৰ বাবে ২০ বছৰ ফেডাৰেল কাৰাদণ্ড, ষড়যন্ত্ৰৰ গোচৰত পাঁচ বছৰ আৰু প্ৰতিটো অবৈধ পাৰিতোষিকৰ গোচৰৰ বাবে ১০ বছৰ পৰ্যন্ত বিধিগতভাৱে সৰ্বোচ্চ কাৰাদণ্ডৰ সন্মুখীন হ’ব লাগিব।

অভিযোগনামা অনুসৰি ২০১৪ চনৰ পৰা ২০২০ চনলৈকে সমগ্ৰ দক্ষিণ কেলিফৰ্ণিয়া আৰু আন কেইবাখনো ৰাজ্যত কাম কৰা ছান ক্লেমেণ্টৰ ছ’ভাৰেইন হেল্থ গ্ৰুপে ৰোগীক আক্ৰমণাত্মকভাৱে খেদি ফুৰিছিল আৰু প্ৰায়ে ব্যক্তিগত বীমা কোম্পানীক উচ্চ হাৰত ৰচিদ দিছিল।

শৰ্মাৰ নিৰ্দেশনাত ছ’ভাৰেইনৰ কৰ্মচাৰীসকলে চিকিৎসাৰ বাবে এটা ভুৱা ফাউণ্ডেশ্যনৰ দ্বাৰা ধন আগবঢ়োৱা হ’ব বুলি ৰোগীক নামভৰ্তিৰ বাবে প্ৰতাৰণা কৰাৰ অভিযোগ উত্থাপন হৈছে।

এই ফাউণ্ডেশ্যনটো ৰোগীৰ তথ্য আহৰণৰ এক কৌশল আছিল যাতে তেওঁলোকৰ হৈ স্বাস্থ্য বীমা কভাৰেজ গোপনে সুৰক্ষিত কৰিব পৰা যায়। ছ’ভাৰেইনে তেওঁলোকক এই পলিচিসমূহৰ জড়িয়তে চিকিৎসালয়ত নামভৰ্তি কৰিব এই সংক্ৰান্তত ৰোগীসকল অজ্ঞাত আছিল। আনকি কৰ্মচাৰীসকলে কেতিয়াবা বীমা কোম্পানীসমূহৰ সৈতে যোগাযোগ কৰাৰ সময়ত ৰোগীৰ ৰূপ লৈছিল বুলিও অভিযোগ উত্থাপন হৈছে।

অভিযোগনামাত প্ৰকাশ কৰা অনুসৰি ছ’ভাৰেইনে স্বাস্থ্যসেৱা প্ৰদানকাৰীৰ অনুমোদন নাথকাকৈয়ে প্ৰৱঞ্চনাৰে বীমা কোম্পানীসমূহক প্ৰস্ৰাৱ বিশ্লেষণৰ বাবে ২৯ মিলিয়ন ডলাৰৰ অধিক ৰচিদ প্ৰদান কৰিছিল।

অভিযোগ মতে তেওঁ কৰ্মচাৰীসকলক এই পৰীক্ষাসমূহ সঘনাই কৰিবলৈ নিৰ্দেশ দিছিল, আৰু চিকিৎসকৰ দ্বাৰা অনুমোদিত বুলি কোৱা পৰীক্ষাৰ বাবে হাজাৰ হাজাৰ দাবী দাখিল কৰিছিল, যিসকলে তেনে কৰা নাছিল, তেওঁলকক তাৰ পৰা নিলম্বন কৰিছিল।

ভুৱা ৰচিদৰ বাহিৰেও শৰ্মাই ৰোগীৰ দালালক ২ কোটি ১০ লাখ ডলাৰতকৈ অধিক ধন দি ৰোগী ক্ৰয় কৰাৰ অভিযোগ উত্থাপন হৈছে। এই অবৈধ লেনদেন লুকুৱাবলৈ ভুৱা চুক্তিৰ জড়িয়তে দালালসকলৰ সেৱাক ব্যৱসায়ীক কাৰ্যকলাপ হিচাপে গাপ দি ৰাখিছিল।

বিবৃতিটোত কোৱা হৈছে যে এফবিআই, আমেৰিকাৰ স্বাস্থ্য আৰু মানৱ সেৱা বিভাগৰ মহাপৰিদৰ্শকৰ কাৰ্যালয় আৰু কেলিফৰ্ণিয়াৰ স্বাস্থ্য সেৱা বিভাগে এই বিষয়ে তদন্ত অব্যাহত ৰাখিছে।

ইয়াত লগতে কোৱা হৈছে যে কেলিফৰ্ণিয়াৰ বীমা বিভাগ, আমেৰিকাৰ শ্ৰম বিভাগৰ কৰ্মচাৰী বেনিফিটছ ছিকিউৰিটি এডমিনিষ্ট্ৰেচন, অফিচ অৱ পাৰ্ছনেল মেনেজমেণ্ট, অফিচ অৱ ইন্সপেক্টৰ জেনেৰেল, আৰু আই আৰ এছ ক্রিমিনেল ইনভেষ্টিগেশ্যনে তদন্তত যথেষ্ট সহায় আগবঢ়াইছে। এই গোচৰৰ বিচাৰ চলাইছে মেজৰ ফ্ৰডছ ছেকচনৰ সহকাৰী আমেৰিকাৰ এটৰ্নী ছলমন কিমে।