চিকিৎসকক অসম জাতীয়তাবাদী যুৱ ছাত্ৰ পৰিষদৰ ‘ধনদাবী’ সন্দৰ্ভত প্ৰতিক্ৰিয়া প্ৰাক্তন শীৰ্ষ নেতাৰ

ডিব্ৰুগড়ৰ অসম চিকিৎসা মহাবিদ্যালয় হস্পিতেলৰ স্নায়ু শল্য চিকিৎসক ডাঃ ধ্ৰুৱজ্যোতি কুৰ্মীয়ে অসম জাতীয়তাবাদী যুৱ ছাত্ৰ পৰিষদৰ বিৰুদ্ধে উত্থাপন কৰা ধাৰাবাহিক ধনদাবীৰ অভিযোগ সন্দৰ্ভত নৰ্থ ইষ্ট নাও-ত শুকুৰবাৰে প্ৰতিক্ৰিয়া প্ৰকাশ কৰিছে সংগঠনটোৰ দুগৰাকী প্ৰাক্তন শীৰ্ষ নেতাই।

ধনদাবীৰ “বদনাম”ক গুৰুত্বসহকাৰে লৈ সংগঠনটোৰ শীৰ্ষ নেতৃত্বক বিষয়টো তদন্ত কৰিবৰ বাবে আহ্বান জনাইছে প্ৰাক্তন সভাপতি বিমল প্ৰসাদ চৌধুৰীয়ে।

“যিহেতু বদনাম ওলাইছে, সেয়ে সংগঠনৰ নেতৃবৃন্দই ‘কেজুৱেলি’ কথাটো ল’ব নালাগে। অসম জাতীয়তাবাদী যুৱ ছাত্ৰ পৰিষদৰ কেন্দ্ৰীয় সমিতিয়ে বিষয়টো চালি-জাৰি চোৱা উচিত, লগতে তদন্ত কৰিও চাব বুলি আশা কৰিছো,” নৰ্থ ইষ্ট নাও-ত এই মন্তব্য প্ৰাক্তন সভাপতিজনৰ।

চৌধুৰীয়ে লগতে কয় যে এনে অভিযোগে সংগঠনটোৰ লগতে সমাজতো বিশৃংখলতাৰ সৃষ্টি কৰে। “সংগঠনৰ নীতি-আদৰ্শৰ বিপৰীতে এইবিলাক চলি থাকিলে সামাজিক বিশৃংখলতাৰ সৃষ্টি হ’ব, যদি কথাটো সত্য হয়। সংগঠনৰ কোনোবাই যদি দাবী কৰিছে সেইটো গৰিহণাযোগ্য,” চৌধুৰীৰ মন্তব্য।

চিকিৎসকজনে যদি মানসিক কষ্ট পাইছে, সেইটো সঁচাই দুখদায়ক বুলি মন্তব্য কৰি চৌধুৰীয়ে লগতে কয় যে ৰাইজে উদযাচি দিয়া ধনেৰেই সংগঠন এটাৰ কাম-কাজ চলিব লাগে।

লগতে পঢ়ক– যুৱ ছাত্ৰ পৰিষদৰ ধাৰাবাহিক ধনদাবীত অতিষ্ঠ স্নায়ু শল্য চিকিৎসক

আনহাতে সংগঠনটোৰ আন এগৰাকী প্ৰাক্তন সভাপতি তথা বৰ্তমান অগপ দলৰ মুখপাত্ৰ দিলীপ পাটগিৰীয়ে কয় যে ঘটনাটো যদি সঁচা তেন্তে চিকিৎসকজনে গোচৰ দাখিল কৰিব লাগে।

পৰিষদৰ সদস্যই পূৰ্বে “ধনদাবী” কৰাৰ উদাহৰণ নাই বুলি উল্লেখ কৰি পাটগিৰীয়ে কয়, “তেওঁ ফে’চবুক পে’জতহে কথাটো উল্লেখ কৰিছে। মই চিকিৎসকজনক মিছা বুলি কোৱা নাই। আইনৰ সহায় ল’লে কথাটোৰ সঁচা-মিছা ওলাই পৰিব। লগতে তেওঁ যুৱ ছাত্ৰ পৰিষদৰ কেন্দ্ৰীয় সমিতিকো কথাটো অৱগত কৰিব লাগে।”

চিকিৎসকজনৰ অভিযোগক লৈ নৰ্থ ইষ্ট নাও-এ প্ৰকাশ কৰা বাতৰিটোৱে ব্যাপক চৰ্চা লাভ কৰিছিল। বিষয়টোক লৈ সংগঠনটোৱে এতিয়ালৈকে কোনো আনুষ্ঠানিক প্ৰতিক্ৰিয়া প্ৰকাশ কৰা নাই।

পৰিষদৰ সাধাৰণ সম্পাদক পলাশ চাংমাইৰ মন্তব্য জানিবৰ বাবে আমি প্ৰায় প্ৰতিদিনাই চেষ্টা কৰি আছো যদিও তেওঁৰ ম’বাইলটো বন্ধ হৈ আছে।