এন আৰ চি বহিৰ্ভূত ভাৰতীয়ক আইনী সাহায্য প্ৰদান কৰিব এ পি চি আৰে
এছছিয়েচন ফৰ প্ৰটেকচন অৱ চিভিল ৰাইটছ (এ পি চি আৰ)এ এন আৰ চিৰ চূড়ান্ত তালিকাৰ পৰা বাদ পৰা ভাৰতীয় লোকক আইনী সাহায্য প্ৰদান কৰিব।
সংস্থাটোৰ অসম শাখাৰ সাধাৰণ সম্পাদক অধিবক্তা আনোৱাৰ হুছেইনে বৃহস্পতিবাৰে গুৱাহাটী প্ৰেছ ক্লাবত সংবাদমেলযোগে এই কথা সদৰী কৰিছে।
তাৰোপৰি অসমৰ ৰাইজকো তেওঁলোকে এক আহ্বান জনাইছে।
‘এন আৰ চিৰ চূড়ান্ত তালিকা প্ৰকাশৰ সময়ত যাতে কোনো দুষ্ট চক্ৰই অসমত অপ্ৰীতিকৰ পৰিস্হিতিৰ সৃষ্টি কৰিব নোৱাৰে তাৰবাবে সমূহ অসমৰ জনগণক সজাগ হ’বলৈ আহ্বান জনাও’, তেওঁ কয়।
ইপিনে উচ্চতম ন্যায়ালয় অনুমোদিত এছ অ’ পিৰ নীতি-নিৰ্দেশনা ভংগ কৰি কোনো ধৰণৰ জাননী জাৰি নকৰাকৈয়ে অকল ফোনেৰে মাতি আনি এন আৰ চি কৰ্তৃপক্ষই “আজিলৈকে” শুনানি গ্ৰহণ কৰা কাৰ্য্যতো আনোবাৰে আশ্চৰ্য্য প্ৰকাশ কৰে।
তেওঁ কয়, ‘যোৱাকালি কামৰূপ (গ্ৰাম্য) জিলাৰ গৰৈমাৰী চক্ৰৰ অন্তৰ্গত কৰাইবিল, ভাউৰীয়া ভিটা, হাটীশলা পাম, হাতীশলা গাওঁ, ভলুকবাৰী, আচলপাৰা, টুকুৰাপাৰা আদি গাঁৱৰ শতাধিক লোকক দিনটোৰ ভিতৰতেই মাতি শুনানি গ্ৰহণ কৰিছিল।’
‘অথচ এছ অ’ পি মতে শুনানিৰ বাবে কমেও ১৫ দিনৰ সময় দি জাননী জাৰি কৰিব লাগে’, তেওঁ কয়।
ইয়াৰ ওপৰি তেওঁ উল্লেখ কৰে যে, ‘এন আৰ চি কৰ্তৃপক্ষৰ এনে কাৰ্য্যৰ আঁৰত শাসক দলৰ হেঁচা বা ষড়যন্ত্ৰ থাকিব পাৰে।’
‘বিগত সময়চোৱাত শাসক দলৰ কেইবাজনো বিধায়কে এন আৰ চি উন্নীতকৰণ সন্দৰ্ভত ধৰ্মীয় সংখ্যালঘু সম্প্ৰদায়ৰ বিৰুদ্ধে বিভিন্ন সময়ত প্ৰকাশ কৰি অহা সাম্প্ৰদায়িক মন্তব্যৰ পৰাই ইয়াৰ অনুমান কৰিব পাৰি’ বুলি মন্তব্য কৰে সম্পাদকগৰাকীয়ে।