অনমনীয় অতুল বৰা, অগপৰ হৈ প্ৰতিদ্বন্দ্বিতা কৰিবই গঁড় ‘হত্যাকাৰী’ গণেশ দলেই

আসন্ন পঞ্চায়ত নিৰ্বাচনত অগপৰ হৈ প্ৰতিদ্বন্দ্বিতা কৰিবই গঁড় ‘হত্যাকাৰী’ গণেশ দলেই। স্থিতি ‘স্পষ্ট’ কৰি দেওবাৰে নৰ্থ ইষ্ট নাও-ক এই কথা জনাই দলটোৰ সভাপতি অতুল বৰাই৷

গোচৰ কাৰ বিৰুদ্ধে নাই বুলি প্ৰশ্ন কৰি গঁড় হত্যাৰ গোচৰ থকা দলেৰ পক্ষত দৃঢ় স্থিতি ঘোষণা কৰিছে অগপ সভাপতি তথা অসমৰ কৃষি মন্ত্ৰীগৰাকীয়ে।

“গোচৰ কাৰ নাই৷ বহু ৰাজনৈতিক নেতাৰে গোচৰ আছে৷ কিন্তু আদালতে এতিয়াও গণেশ দলেক দোষী বুলি ঘোষণা কৰা নাই৷ গতিকে নিৰ্বাচন আয়োগে গণেশ দলেক প্ৰতিদ্বন্দ্বিতা কৰিব নোৱাৰিব বুলি কোৱা নাই,” বৰাৰ স্পষ্ট মন্তব্য।

গঁড় হত্যাৰ গোচৰ পোহৰলৈ অহাত কংগ্ৰেছ দলে বিশ্বনাথ চাৰিআলিত এগৰাকী প্ৰাৰ্থীৰ মনোনয়ন বাতিল কৰাৰ বিষয়ে তেওঁ ‘অৱগত নহয়’ বুলি জনায় অগপ নেতাজনে।

অগপ সভাপতিগৰাকীৰ সমষ্টি বোকাখাতৰ মৰিধনশিৰি পঞ্চায়তৰ সভাপতি পদত মনোনয়ন দাখিল কৰা দলে নিৰ্বাচনত জয়ী হ’ব বুলিও দাবী কৰিছে বৰাই।

দলেৰ বিপক্ষে কাজিৰঙা ৰাষ্ট্ৰীয় উদ্যানৰ অগৰাতলী বনাঞ্চল, বোকাখাত আৰু কাৰ্বি আংলঙৰ ৰংবংৱে থানাত গঁড় হত্যা সন্দৰ্ভত ৪টা গোচৰ পঞ্জীয়ন হৈ আছে৷

দেওবাৰে বোকাখাতৰ এখন দলীয় সভাত অংশ গ্ৰহণ কৰি বৰাৰ লগতে মন্ত্ৰী ফণীভূষণ চৌধুৰী আৰু কেশৱ মহন্তই দলৰ প্ৰাৰ্থীসকলক পঞ্চায়ত নিৰ্বাচনত দলৰ ৰণ কৌশল সম্পৰ্কে অৱগত কৰে৷