ঢাকাত অনুষ্ঠিত পেচাপল’ এচিয়ান চেম্পিয়নশ্বিপত ভাৰতীয় দলৰ হৈ উজলিল অসমৰ ১৩ গৰাকী খেলুৱৈ
বাংলাদেশৰ ৰাজধানী ঢাকাত ১৭ মে’ৰ পৰা ২০ মে’লৈ অনুষ্ঠিত হোৱা পেচাপল’ এচিয়ান চেম্পিয়নশ্চিপ প্ৰতিযোগিতাত অংশগ্ৰহণ কৰি ভাৰতে দুটা সোণ আৰু তিনিটা ৰূপৰ পদক দখল কৰিবলৈ সক্ষম হয়।
ভাৰতীয় দলটোত অসমৰ মুঠ তেৰগৰাকী অসমৰ প্ৰতিভাৱান খেলুৱৈ অংশগ্ৰহণ কৰি দেশৰ লগত অসমলৈ গৌৰৱ কঢ়িয়াই আনিবলৈ সক্ষম হয়।
প্ৰতিযোগিতাখনত ঘৰুৱা দল বাংলাদেশৰ লগতে ভাৰত, নেপাল আৰু ভূটানে অংশগ্ৰহণ কৰিছিল।
৪৩ গৰাকী খেলুৱৈৰে গঠিত ভাৰতীয় দলটোৰ প্ৰশিক্ষক আৰু মেনেজাৰ হিচাপে আছিল ক্ৰমে প্ৰতীক পাৰেখ আৰু পৱন কুমাৰ।
সোণৰ পদক দখল কৰা ভাৰতীয় দলটোৰ হৈ অংশগ্ৰহণ কৰা অসমৰ খেলুৱৈ দুগৰাকী হ’ল ক্ৰমে- কংকনজ্যোতি ডেকা (পুৰুষ) আৰু শিখামণি দাস (ছোৱালী)।
আনহাতে, ৰূপৰ পদক দখল কৰা ভাৰতীয় দলটোৰ হৈ অংশগ্ৰহণ কৰা অসমৰ খেলুৱৈ সকল হ’ল ক্ৰমে- ৰফিকুল ইছলাম (পুৰুষ), চতুলাল চৌহান (পুৰুষ), সৌৰভজ্যোতি বৰা (পুৰুষ), কৃষ্ণাক্ষী বৰা (মহিলা), সদুপ্তী নেওগ (জুনিয়ৰ, ল’ৰা), জ্যোতিৰ্ময় বৰা (জুনিয়ৰ, ল’ৰা), ভক্তিপ্ৰতিম বৰা (জুনিয়ৰ, ল’ৰা), পংকজ বৰা (জুনিয়ৰ, ল’ৰা), লক্ষ্যজ্যোতি বৰা (জুনিয়ৰ ল’ৰা) আৰু কৰৱী বৰুৱা (জুনিয়ৰ, ছোৱালী)।
ভাৰতীয় দলটোৰ হৈ অংশগ্ৰহণ কৰা অসমৰ সুদীপ্ত নেওগ, জ্যোতিৰ্ময় বৰা, জ্যোতিষ্মান বৰা, ভক্তিপ্ৰতিম বৰা, লক্ষ্যজ্যোতি বৰা কলিয়াবৰ শিশুবিদ্যাপীঠ উচ্চ মাধ্যমিক বিদ্যালয়, কুঁৱৰীটোলৰ ছাত্ৰ।
কলিয়াবৰৰ ক্ৰীড়াপ্ৰেমী ৰাইজে ভাৰতীয় দলটোৰ লগতে অসমৰ খেলুৱৈ সকলৰ সফলতাত আনন্দ প্ৰকাশ কৰিছে।