অসমলৈ আনিলে হিজবুল মুজাহিদীনৰ সদস্য কামৰুজ জামানক; অসম আৰক্ষীয়ে চলাব মাৰাথন জেৰা

সন্ত্ৰাস বিৰোধী বাহিনীৰ দ্বাৰা কানপুৰত গ্ৰেপ্তাৰ হোৱা অসমৰ হোজাইৰ সন্তান তথা হিজবুল মুজাহিদীনৰ সদস্য কামাৰুজ জামানক ৬ অক্তোবৰত অসমলৈ অনা হৈছে। তেওঁক অসম আৰক্ষীয়ে বিশেষ মাৰাথন জেৰা চলাব বুলি জানিব পৰা গৈছে।

অসম আৰক্ষীৰ বিশেষ সঞ্চালক প্ৰধান (বিশেষ শাখা) পল্লৱ ভট্টাচাৰ্য্যই আজি সংবাদ মাধ্যমৰ আগত এই কথা জানিবলৈ দিয়ে।

“আমি জামানক জেৰা কৰিবৰ বাবে কিছু দিনৰ বাবে ইয়ালৈ আনিছো। আমি তেওঁক অহা ১০ অক্তোবৰত উত্তৰ প্ৰদেশ আৰক্ষীৰ হাতত তেওঁলোকে চলাই থকা তদন্ত প্ৰক্ৰিয়াৰ বাবে গতাই দিম।” এইদৰে কয় পল্লৱ ভট্টাচাৰ্য্যই।

উল্লেখযোগ্য যে কাশ্মীৰৰ বিচ্ছিন্নতাবাদী তথা সন্ত্ৰাসবাদী সংগঠন হিজবুল মুজাহিদীনৰ সদস্য হিচাপে যোগদান কৰা বুলি পোৱা তথ্যৰ ভিত্তিত যোৱা ১৩ ছেপ্তেম্বৰত উত্তৰ প্ৰদেশৰ কানপুৰত সন্ত্ৰাসবাদী বিৰোধী বাহিনীয়ে গ্ৰেপ্তাৰ কৰিছিল কামাৰুজক।

আৰক্ষীয়ে জনোৱা মতে, কামাৰুজে জন্মু আৰু কাশ্মীৰত কৰ্মৰত হৈ থাকোতেই সন্ত্ৰাসবাদী সংগঠনটোত যোগদান কৰে আৰু অসমতো আহি সংগঠনটোৰ বাবে সদস্য ভৰ্তি অভিযান চলাইছিল। তেওঁ গ্ৰেপ্তাৰ হোৱা পূৰ্বে আগষ্ট মাহত অসমৰ হোজাই জিলাৰ কচুৱাত ৰিয়াজুদ্দিন ভূঞা নামৰ এজনৰ ঘৰত ভালেকেইদিন থাকি গৈছিল।

কামাৰুজক সহায় কৰাৰ অভিযোগত আৰক্ষীয়ে হোজাইৰ পৰা ৰিয়াজুদ্দিন ভূঞাৰ উপৰি আন কেইবাজনকো আটক কৰিছিল।