‘গণতন্ত্ৰ’ উদযাপনৰ দিনটোতে খানাপাৰাত চৰকাৰে কাঢ়িলে নাগৰিকৰ গণতান্ত্ৰিক অধিকাৰ!

ভাৰত গণতন্ত্ৰ হিচাপে প্ৰতিষ্ঠিত হোৱাৰ আজিৰ দিনটোতে গণৰাজ্য দিৱস পাতিবলৈ গৈ ৰাজ্য চৰকাৰে নাগৰিকৰ গণতান্ত্ৰিক অধিকাৰ খৰ্ব কৰাৰ গুৰুতৰ অভিযোগ আহিল নাগৰিকৰ পৰা।

আজি খানাপাৰাৰ খেলপথাৰত পতা গণৰাজ্য দিৱসৰ চৰকাৰী কাৰ্য্যসূচীৰ সময়ত ‘নিৰাপত্তা’ৰ দিশটোতকৈ মুখ্য মন্ত্ৰীৰ নাক বচাবলৈ অধিক কষ্ট কৰা আৰক্ষীৰ কাৰ্য্যত চৰকাৰৰ এই অগণতান্ত্ৰিক স্বৰূপ ওলাই পৰে।

শেহতীয়াকৈ নাগৰিকত্ব সংশোধনী বিধেয়কখনৰ প্ৰতিবাদত কৰা ক’লা পতাকা প্ৰদৰ্শনে কেইবা ঠাইতো বিব্ৰত কৰা মুখ্য মন্ত্ৰীয়ে আজি গণৰাজ্য দিৱসৰ দিনটোতো সেই আতংকৰ পৰা মুক্ত হ’ব নোৱাৰিলে। মুখ্য মন্ত্ৰীক যাতে আজিৰ দিনটোত কোনো লোকেই ক’লা পতাকা, ক’লা কাপোৰ দেখুৱাব নোৱাৰে তাৰ ব্যৱস্থা কৰিবলৈ গৈ আৰক্ষীয়ে গণতান্ত্ৰিক অধিকাৰ হৰণ কৰে নাগৰিকৰ।

খেলপথাৰলৈকে সোমাই যোৱা পথছোৱাত তিনি ঠাইত তালাচী চলাই গণতন্ত্ৰ দিৱস উপভোগ কৰিবলৈ যোৱা প্ৰতিজন নাগৰিকৰ পৰা কাঢ়ি লোৱা হ’ল জেপত থকা ক’লা ৰুমালকে ধৰি সকলো ধৰণৰ ক’লা কাপোৰ।

অগণতান্ত্ৰিক আৰু নাগৰিকৰ অধিকাৰ হৰণৰ এই ঘটনাৰ পৰা সাৰি নগ’ল তাত অংশগ্ৰহণ কৰিবলৈ যোৱা শিশু আৰু ছাত্ৰ-ছাত্ৰীও। আৰক্ষীয়ে কণ-কণ ছাত্ৰ-ছাত্ৰীয়ে স্বাস্থ্যৰ বাবে মুখত মাৰি যোৱা মাস্কখনো কাঢ়ি লোৱাৰ কুণ্ঠাবোধ নকৰিলে।

এজন ছাত্ৰই ধূলিৰ পৰা বাচিবলৈ মুখত এখন মাস্ক পিন্ধি আহিছিল। কিন্তু ছাত্ৰজনে সেইখন ভিতৰলৈ নিব নোৱাৰিলে। “কাৰণ মাস্কখন ক’লা আছিল”, এজন প্ৰত্যক্ষদৰ্শীয়ে কয়।

“আন এজন ছাত্ৰই মুখ মচিবৰ বাবে ব্যৱহাৰ কৰা ৰুমালখনত ক’লা ৰং থকা বাবেই কাঢ়ি লৈ যোৱা হ’ল ৰুমালখন।” নাগৰিকজনে কয়।

অন্যান্য নাগৰিকৰ লগতে কণ-কণ ছাত্ৰ-ছাত্ৰীৰ বেগো খুঁচৰি চায় নিৰাপত্তাৰ দায়িত্বত থকা আৰক্ষী বাহিনীয়ে।

আন একাংশক ক’লা কাপোৰ পিন্ধি যোৱাৰ বাবেই প্ৰৱেশত বাধা আৰোপ কৰা হয়। আনকি ক’লা জেকেট, কোট, ছুৱেটাৰো খুলি গণৰাজ্য দিৱস ‘উপভোগ’ৰ বাবে প্ৰবেশ কৰিব লগীয়া হয় বহু নাগৰিকক।

“মোৰ জেকেটো ক’লা, তলৰ টি-ছাৰ্টটোও ক’লা, এতিয়া মই গোটেইকেইটা খুলি কেনেকৈ ভিতৰ সোমাম?” এজন অসহায় কিশোৰে সংবাদ মাধ্যমৰ আগত এইদৰে আক্ষেপ কৰে।

উল্লেখযোগ্য যে আজিৰ গণৰাজ্য দিৱসৰ কাৰ্য্যসূচীটোত মুখ্য অতিথি হিচাপে উপস্থিত আছিল ৰাজ্যপাল জগদীশ মুখী আৰু মুখ্য মন্ত্ৰী সৰ্বানন্দ সোণোৱাল।

ৰাজ্যখনৰ সাংবিধানিক মুৰব্বী আৰু প্ৰশাসনিক মুৰব্বীৰ নিৰাপত্তাৰ নামত ভাৰত গণতন্ত্ৰৰ প্ৰতিষ্ঠাৰ দিনটোতে নাগৰিকৰ গণতান্ত্ৰিক অধিকাৰ কাঢ়ি লোৱাৰ এই ঘটনাই চৰকাৰৰ ‘অগণতান্ত্ৰিক’ স্বৰূপ উদঙাই দিয়ে।