প্ৰথমে আত্মসমৰ্পণ, তাৰ পাছত CIDৰ হাতত গ্ৰেপ্তাৰ ৰাজ্যৰ মুখ্য সচিবৰ ভাতৃ সঞ্জীত কৃষ্ণ

SI কেলেংকাৰিত জড়িত হোৱাৰ অভিযোগত গ্ৰেপ্তাৰ হ’ল  ৰাজ্যৰ মুখ্য সচিবৰ ভাতৃ তথা কৰিমগঞ্জৰ প্ৰাক্তন আৰক্ষী অধীক্ষক  সঞ্জীত কৃষ্ণ।

উলুবাৰিস্থিত DGP কাৰ্যালয়ত আত্মসমৰ্পণ কৰাৰ পাছত পৃথকে পৃথকে আৰক্ষীৰ অতিৰিক্ত সঞ্চালক প্ৰধান জি পি সিঙৰ লগতে CID ৰ দুটা দলে জেৰা চলায়।

জেৰাৰ পাছত নিশা প্ৰায় ৮ বজাত CID য়ে গ্ৰেপ্তাৰ কৰে সঞ্জীতক।

সঞ্জীতক পোনে পোনে CID কাৰ্যালয়লৈ লৈ যোৱা হয়। কাইলৈ কামৰূপ মহানগৰ জিলা মুখ্য ন্যায়িক দণ্ডাধীশ আদালতত হাজিৰ কৰোৱা হ’ব সঞ্জীতক।

উল্লেখযোগ্য যে,প্ৰায় ৩৬ ঘণ্টা আত্মগোপন কৰি থকাৰ পাছত আজি দুপৰীয়া প্ৰায় ১২ বজাত উপস্থিত হৈ আত্মসমৰ্পণ কৰে আৰক্ষী সঞ্চালক প্ৰধানৰ কাৰ্যালয়ত।

কালিৰে পৰা CID য়ে বিচাৰি আছিল সঞ্জীত কৃষ্ণক। কিন্তু কোনো নিৰ্দিষ্ট ঠাইত থকাৰ বাবে তেওঁক গ্ৰেপ্তাৰ কৰিব পৰা নাছিল।

ইতিমধ্যে গ্ৰেপ্তাৰ হোৱা ৰুবুল হাজৰিকা ওৰফে ৰুবুল আলিয়ে স্বীকাৰুক্তিত নাম লৈছিল সঞ্জীতৰ।

উল্লেখযোগ্য যে, সোমবাৰৰ পৰা CID কাৰ্যালয়ত জেৰা চলোৱা হৈছিল কৰিমগঞ্জৰ প্ৰাক্তন আৰক্ষী অধীক্ষক গৰাকীক।

CID ৰ উচ্চ পদস্ত বিষয়া আৰু আৰক্ষীৰ অতিৰিক্ত সঞ্চালক প্ৰধান GP সিঙে পৃথকে পৃথকে সঞ্জীতক জেৰা চলাইছিল বুলি সূত্ৰত প্ৰকাশ পাইছিল।

সঞ্জীতৰ পৰা আৰক্ষীয়ে ইতিমধ্যে দুটাকৈ মোবাইল জব্দ কৰিছে বুলি জানিব পৰা গৈছে।

কিন্তু কালি দুপৰীয়াভাগৰ পৰা CID ৰে সংযোগ বিচ্ছিন্ন হয় সঞ্জীতৰ।

কৰিমগঞ্জৰ আৰক্ষী অধীক্ষকৰ কাৰ্য্যালয়ৰ পৰাই প্ৰশ্ন কাকত ফাদিল হোৱা বুলি ইতিমধ্যে CID ৰ আগত অক্ষয় টেলি কমিউনিকেশ্যনৰ ৰুবুল হাজৰিকাই স্বীকাৰুক্তি দিছে বুলি সূত্ৰত প্ৰকাশ পাইছে।

অভিযোগ অনুসৰি ৪০ লাখ টকাৰ বিনিময়ত ৰুবুলক প্ৰশ্নকাকত ফটো মাৰি লোৱাৰ অনুমতি দিছিল সঞ্জীতে। সেই ফটো দিবন ডেকালৈ WHATSAPP যোগে ৰুবুল হাজৰিকাই প্ৰেৰণ কৰিছিল বুলিও খবৰ প্ৰকাশ পাইছে।

CID য়ে  সঞ্জীত কৃষ্ণৰ হাউচ গাৰ্ড, তিনি কনিষ্টবল, দত্ত উপাধিধাৰী কৰিমগঞ্জৰ ট্ৰেফিক SI ৰ স্বীকাৰুক্তি বা জবানবন্দী সঞ্জীতৰ বিৰুদ্ধে প্ৰমাণ হিচাপে দাখিল কৰিব বুলি সূত্ৰত প্ৰকাশ পাইছে।

উল্লেখ্য যে যোৱা ১১ অক্টোবৰত কুমাৰ সঞ্জিত কৃষ্ণক কৰিমগঞ্জৰ পৰা বৰপেটাৰ এফ আৰ আৰ অ’ৰ আৰক্ষী অধীক্ষক হিচাপে বদলি কৰে। সূত্ৰ অনুসৰি, সঞ্জিত কৃষ্ণক শাস্তিমূলকভাৱে এই গুৰুত্বহীন পদটোলৈ বদলি কৰা হয়।