নদুৱাৰত কংগ্ৰেছ প্ৰাৰ্থী সুনীল কুমাৰ ছেত্ৰীৰ ওপৰত দুষ্কৃতিকাৰীৰ বৰ্বৰ আক্ৰমণ; তীব্ৰ গৰিহণা গৌৰৱ গগৈৰ
আগন্তুক নিৰ্বাচনৰ পূৰ্বে ৰাজ্যত ক্ৰমাৎ বৃদ্ধি পাইছে নিৰ্বাচনী হিংসাৰ ঘটনা। নদুৱাৰ সমষ্টিৰ ভাৰতীয় জাতীয় কংগ্ৰেছ দলৰ প্ৰাৰ্থী সুনীল কুমাৰ ছেত্ৰীৰ ওপৰত সমষ্টিটোৰ নমাইল অঞ্চলত দুষ্কৃতিকাৰীয়ে চলোৱা এক বৰ্বৰ আক্ৰমণৰ ঘটনাই সমগ্ৰ ৰাজ্যত তীব্ৰ প্ৰতিক্ৰিয়াৰ সৃষ্টি কৰিছে। এই আক্ৰমণত গুৰুতৰভাৱে আহত হোৱা প্ৰাৰ্থীগৰাকীক উন্নত চিকিৎসাৰ বাবে তৎকালীনভাৱে তেজপুৰ চিকিৎসা মহাবিদ্যালয়ত ভৰ্তি কৰোৱা হৈছে। এই অনাকাংক্ষিত ঘটনাক অসম প্ৰদেশ কংগ্ৰেছৰ জ্যেষ্ঠ নেতা গৌৰৱ গগৈয়ে তীব্ৰ ভাষাৰে গৰিহণা দিয়াৰ লগতে দুষ্কৃতিকাৰীসকলক অতি শীঘ্ৰে গ্ৰেপ্তাৰ কৰি কঠোৰ শাস্তি প্ৰদান কৰিবলৈ প্ৰশাসনৰ ওচৰত দাবী জনাইছে।
অসম প্ৰদেশ কংগ্ৰেছ কমিটীৰ সংবাদ মাধ্যম আৰু যোগাযোগ বিভাগৰ তৰফৰ পৰা প্ৰকাশ কৰা এক বিবৃতিযোগে গৌৰৱ গগৈয়ে আহত প্ৰাৰ্থী সুনীল কুমাৰ ছেত্ৰীৰ আশু আৰোগ্য কামনা কৰে। তেওঁ জিলা প্ৰশাসনৰ ভূমিকাক লৈ তীব্ৰ ক্ষোভ উজাৰি অভিযোগ কৰে যে প্ৰশাসনে সম্পূৰ্ণৰূপে শাসকীয় দলৰ নিৰ্দেশত কাম কৰি আছে। নিৰ্বাচনী অধিসূচনা জাৰি হোৱাৰ পিছতো প্ৰশাসনে বিৰোধী দলৰ নেতা-কৰ্মীক পৰ্যাপ্ত নিৰাপত্তা প্ৰদান কৰাত চূড়ান্তভাৱে ব্যৰ্থ হোৱা বুলি তেওঁ উল্লেখ কৰে। গগৈৰ মতে, প্ৰশাসনৰ এনে পক্ষপাতিত্বমূলক আচৰণে গণতন্ত্ৰ আৰু সংবিধানক হত্যা কৰিছে। সেয়েহে, ৰাজ্যত এক মুক্ত আৰু নিকা নিৰ্বাচন অনুষ্ঠিত কৰাৰ স্বাৰ্থত নিৰ্বাচন আয়োগক তৎকালীনভাৱে কঠোৰ ব্যৱস্থা গ্ৰহণ কৰিবলৈ তেওঁ দাবী জনায়।
উল্লেখ্য যে, এই আক্ৰমণৰ ঘটনাত কেৱল প্ৰাৰ্থীগৰাকীয়েই নহয়, অসম প্ৰদেশ কংগ্ৰেছ কমিটীৰ জ্যেষ্ঠ মুখপাত্ৰ ৰূপা কলিতাকে ধৰি আন কেইবাজনো লোক আহত হয়। বৰ্তমান ৰূপা কলিতাও গুৰুতৰ আঘাতপ্ৰাপ্ত হৈ তেজপুৰ চিকিৎসা মহাবিদ্যালয়ত চিকিৎসাধীন হৈ আছে। সমগ্ৰ ঘটনাটোক লৈ বিৰোধী দলৰ দলপতি দেৱব্ৰত শইকীয়ায়ো গভীৰ উদ্বেগ প্ৰকাশ কৰে। তেওঁ এই বৰ্বৰ ঘটনাৰ এক নিৰপেক্ষ তদন্তৰ জৰিয়তে দোষীসকলক চিনাক্ত কৰি কঠোৰ আইনী ব্যৱস্থা গ্ৰহণ কৰিবলৈ দাবী জনাইছে। আনহাতে, অসম প্ৰদেশ কংগ্ৰেছ কমিটীৰ সংবাদ মাধ্যম বিভাগৰ অধ্যক্ষ বেদব্ৰত বৰায়ো এই আক্ৰমণক তীব্ৰ গৰিহণা দি নিৰ্বাচন আয়োগক ৰাজ্যত এক সুস্থ তথা ভয়মুক্ত নিৰ্বাচনী পৰিৱেশ গঢ়ি তুলিবলৈ আহ্বান জনাইছে।