গুৱাহাটীত সচিবালয়ৰ কৰ্মচাৰীৰ আত্মহত্যা; জ্যেষ্ঠ বিষয়াক জগৰীয়া আত্মহত্যাৰ টোকাত

অসম সচিবালয়ৰ এজন কৰ্মচাৰীয়ে সোমবাৰে গুৱাহাটীত আত্মহত্যা কৰে।

বৰপেটাৰ মূল বাসিন্দা বিবেক দাস নামৰ কৰ্মচাৰীজনে গুৱাহাটীৰ জৱাহৰনগৰত থকা তেওঁৰ হাউছিং কমপ্লেক্সৰ বাসভৱনত চিপ লৈ আত্মহত্যা কৰে।

তেওঁ অসম সচিবালয়ৰ সাধাৰণ প্ৰশাসন বিভাগৰ জ্যেষ্ঠ প্ৰশাসনীয় সহায়ক হিচাপে কৰ্মৰত আছিল।

পৰিয়ালৰ সূত্ৰই জনায় যে এৰি থৈ যোৱা এটা আত্মহত্যাৰ টোকাত মানসিক নিৰ্যাতন চলোৱাৰ বাবে জ্যেষ্ঠ বিষয়াক দোষাৰোপ কৰিছে।

টোকাটোত তেওঁ উল্লেখ কৰিছে যে তেওঁ তেওঁৰ কৰ্তব্য নিয়াৰিকৈ কৰি অহা সত্তেও তেওঁক কৰ্তপক্ষই কৰ্তব্যত গাফিলতি কৰা বুলি অভিযুক্ত কৰিছিল।

‘’মই কামচোৰ নহয়। বেছিকৈ কাম কৰি মোৰ ভুল হোৱা বুলি ভাৱ হৈছে। যোৱা কিছুদিন ধৰি কিবা বিবেক দংশন হৈ আছে। occupants আৰু contractor সকলোকে হেল্প কৰি গৈছিলো যোৱা চাৰি বছৰে। FA যোৱা বছৰ কিবা ভুল কৰি এতিয়া যেন সব মইহে জবাবদিহি হ’ব লগা পৰিছে। মই চম্ভালিব নোৱাৰিলো। নিজৰ মান-সন্মানৰ কাৰণে সকলোকে ছাৰ্ভিচ দিব চেষ্টা কৰাতো মোৰ দোষ হ’ব নোৱাৰে। দোষ যদি সকলোবোৰৰ এটা বিচাৰ হ’ব লাগিব,‘’-দাসে তেওঁৰ আত্মহত্যাৰ টোকাত এইদৰে লিখি গৈছে।

দাসে বৰপেটাৰ পৰা ঘৰৰ পৰা ঘুৰি অহাৰ কেইঘন্টামানৰ পাছতে গুৱাহাটীৰ বাসগৃহত এই চূড়ান্ত পদক্ষেপ গ্ৰহণ কৰে।

সূত্ৰসমূহে জানিবলৈ দিয়া মতে দাস কিছুদিন ধৰি অশান্তিত আছিল যদিও সেয়া তেওঁ কাকো জনোৱা নাছিল।