ছিকিমত অনুষ্ঠিত ৰাষ্ট্ৰীয় পাঞ্জা প্ৰতিযোগিতাত ৩০ টা পদকেৰে অসমৰ শ্ৰেষ্ঠত্ব
বিগত ২৮ জুলাইৰ পৰা ৩১ জুলাইলৈ ছিকিমত অনুষ্ঠিত হোৱা ৩৮ সংখ্যক ৰাষ্ট্ৰীয় পাঞ্জা প্ৰতিযোগিতাত অসমে মুঠ ৩০ টা পদকেৰে প্ৰতিযোগিতাখনৰ পদক তালিকাত শীৰ্ষস্থান দখল কৰিবলৈ সক্ষম হয়।
অসমে প্ৰতিযোগিতাখনত ১০ টা সোণ, ১০ টা ৰূপ আৰু ১০ টা ব্ৰঞ্জৰ পদকেৰে সৰ্বমুঠ ৩০ টা পদক দখল কৰি ২২০ পইন্ট অৰ্জন কৰে আৰু প্ৰতিযোগিতাৰ শ্ৰেষ্ঠ দলৰ সন্মান লাভ কৰে।
ছিনিয়ৰ আৰু জুনিয়ৰ দুটা শাখাত অনুস্হিত প্ৰতিযোগিতাখনৰ জুনিয়ৰ শাখাত অসমৰ দেৱজিৎ কাৰদং (৭০কেজি), নিতুশ্ৰী সোণোৱাল(৫৫কেজি), মানস বাইলুং(৫৫কেজি), জিন্টু দাসে (৭৮ কেজি) সোণৰ পদক লাভ কৰিবলৈ সক্ষম হয়।
আনহাতে, ছিনিয়ৰ শাখাত অৰূপ সোণোৱাল (৬০ কেজি) , মানস বাইলুং (৫৫ কেজি) আৰু অনিৰুদ্ধ দাসে (৫৫ কেজি) সোণৰ পদক অৰ্জন কৰি ৰাজ্যলৈ গৌৰৱ কঢ়িয়াই আনে।
আৰ্ম ৰেষ্টলিং ফেডাৰেশ্যন অব ইণ্ডিয়াই অনুষ্ঠিত কৰা প্ৰতিযোগিতাখনত ক্ৰমে দ্বিতীয় আৰু তৃতীয় স্থান অধিকাৰ কৰে মণিপুৰ আৰু কেৰেলাই।
প্ৰতিযোগিতাখনত পদক দখল কৰি ৰাজ্যলৈ গৌৰৱ কঢ়িয়াই অনা খেলুৱৈসকলক শুভেচ্ছা জ্ঞাপন কৰে সদৌ অসম পাঞ্জা এছোচিয়েচনৰ সভাপতি দেৱজ্যোতি গগৈয়ে।
মুঠ ৯ খন ৰাজ্যৰ খেলুৱৈয়ে অংশগ্ৰহণ কৰা প্ৰতিযোগিতাখনত ৩৪ গৰাকী খেলুৱৈৰে গঠিত অসম দলটোৰ সফলতাত ৰাজ্যবাসী উৎফুল্লিত হৈ পৰিছে।