ৰাজ্যসভাত বিধেয়ক উত্থাপন নোহোৱাত ৰাজ্যজুৰি আনন্দ-উল্লাস

আজি ৰাজ্যসভাত নাগৰিকত্ব সংশোধনী বিধেয়ক উত্থাপন নোহোৱাত উত্তৰ-পূবৰ লগতে সমগ্ৰ অসমতে বিধেয়ক বিৰোধী প্ৰতিবাদকাৰীকে ধৰি সাধাৰণ নাগৰিকসকল উৎফুল্লিত হৈ পৰা দেখিবলৈ পোৱা গৈছে।

শিৱসাগৰ : নাগৰিকত্ব সংশোধনী বিধেয়ক ৰাজ্যসভাত গৃহীত নোহোৱাত সমগ্ৰ ৰাজ্যৰ লগতে শিৱসাগৰতো পালন কৰা হয় আনন্দ-উৎসৱ। আজি আবেলি অসম ছাত্ৰ যুৱ সন্মিলনে শিৱসাগৰৰ দ’লমুখ চাৰিআলিত অসমীয়াৰ স্বাভিমানৰ বিজয় উৎসৱ পালন কৰে।

সংগঠনটোৰ নেতা কৰ্মীৰ লগতে জাতিক ভালপোৱা সকলো লোকে এই কাৰ্যসূচীত অংশগ্ৰহণ কৰে। সংগঠনটোৱে নগৰৰ ষ্টেশ্যন চাৰিআলিত ঢোল পেঁপা বজাই বিহু গাই আনন্দ উল্লাসেৰে শোভাযাত্ৰা কৰি দ’লমুখ চাৰিআলিত দীৰ্ঘসময় ধৰি বিহুনৃত্যৰে আনন্দত আত্মহাৰা হৈ পৰে।

তেওঁলোকৰ এই কাৰ্যসূচীত কৃষক মুক্তি সংগ্ৰাম সমিতিৰ লগতে ঐক্য সেনা অসমৰ নেতা কৰ্মীসকলেও অংশগ্ৰহণ কৰি ফটকা ফুটাই নৃত্যগীতেৰে পৰিবেশ আনন্দময় কৰি তোলে।

ইয়াৰোপৰি আছু কৰ্মীসকলেও নগৰখনৰ বৰ্ডিং ৰোডত থকা শিৱসাগৰ জিলা ছাত্ৰ সন্থাৰ কাৰ্যালয়ৰ সন্মুখত আতচবাজী ফুটাই বিজয় উৎসৱ পালন কৰে।

কলিয়াবৰ : নাগৰিকত্ব সংশোধনী বিধেয়ক ৰাজ্যসভাত উত্থাপন নোহোৱাত আজি সমগ্ৰ ৰাজ্যৰ লগতে কলিয়াবৰটো উৎসৱমুখৰ পৰিৱেশৰ সৃষ্টি হয়।

বিধেয়ক ৰাজ্যসভাত উত্থাপন নোহোৱাৰ খবৰ পোৱা মাত্ৰকে কলিয়াবৰ ছাত্ৰ সন্থাৰ বিষয়ববীয়া সকলে আতচবাজি ফুটাই আনন্দ উল্লাস প্ৰকাশ কৰে।

আছুৰ কেন্দ্ৰীয় উপ সভাপতি মণি মাধৱ মহন্তৰ উপস্থিতিত ছাত্ৰ সন্থাৰ বিষয়ববীয়া সকলে বিজেপি গ’ বেক, সৰ্বানন্দ সোণোৱাল হায় হায়, হিমন্ত বিশ্ব শৰ্মা মূর্দাবাদ, অসম চৰকাৰ কাম নাই, নৰেন্দ্ৰ মোদী হুচিয়াৰ আদি ধ্বনিৰে পৰিবেশ উত্তাল কৰি তোলে।

আছুৰ এই বিজয় উৎসৱত কলিয়াবৰৰ বিভিন্ন দল-সংগঠনৰ লগতে স্থানীয় সচেতন ৰাইজেও অংশগ্ৰহণ কৰে।