ৰঞ্জী ট্ৰফী :২০১৯-২০; ঝাৰখণ্ডৰ বিৰুদ্ধে মাত্ৰ ১৬২ ৰাণতে প্ৰথম ইনিংছ সামৰিলে অসমে

আজিৰ পৰা ঝাৰখণ্ডৰ ৰাঁচীৰ ঝাৰখণ্ড ষ্টেট ক্ৰিকেট এছ’চিয়েচনৰ গ্ৰাউণ্ডত অসম আৰু ঝাৰখণ্ডৰ মাজত অনুষ্ঠিত হোৱা ৰঞ্জী ট্ৰফীৰ খেলখনত প্ৰথমে বেট ধৰি শোচনীয় আৰম্ভণি কৰিছে আলহী দল অসমে।

টছত জয়ী হৈ প্ৰথমে বেটিং কৰাৰ সিদ্ধান্ত গ্ৰহণ কৰা অসমে প্ৰথম দিনৰ খেলৰ অন্তত নিজৰ প্ৰথম ইনিংছত আটাইকেইটা উইকেট হেৰুৱাই মাত্ৰ ১৬২ ৰাণহে কৰিবলৈ সক্ষম হয়।

অসমৰ হৈ সৰ্বাধিক ৫৫ ৰাণ কৰে উদীয়মান ক্ৰিকেটাৰ ৰিয়ান পৰাগে।

ৰিয়ান পৰাগৰ বাহিৰে দলটোৰ আন সকলো বেটছমেন শোচনীয়ভাৱে ব্যৰ্থ হয়।

আনহাতে, ঝাৰখণ্ডৰ হৈ বলিঙত সৰ্বাধিক ৪ টা উইকেট দখল কৰে অনুকুল ৰয়ে। অনুকুলৰ উপৰিও আশিস কুমাৰ আৰু শ্বাহবাজ নাদিমে তিনিটাকৈ উইকেট দখল কৰি অসমৰ ইনিংছ চমু চপাই আনে।

উল্লেখযোগ্য যে, অসমত বৰ্তমান নাগৰিকত্ব (সংশোধনী)আইনৰ বিৰুদ্ধে চলি থকা তীব্ৰ প্ৰতিবাদৰ বাবে অসম আৰু ঝাৰখণ্ডৰ মাজত গুৱাহাটীৰ বৰ্ষাপাৰাত অনুষ্ঠিত হ’বলগীয়া খেলখন ৰাঁচীলৈ সলনি কৰা হৈছিল।