জম্মু-কাশ্মীৰৰ ডোডাত গভীৰ খাৱৈত পৰিল সেনাৰ বাহন; কমেও ১০ জন জোৱান নিহত

জম্মু-কাশ্মীৰৰ ডোডাত সেনাৰ গাড়ী খাৱৈত বাগৰি পৰি হোৱা দুৰ্ঘটনাত কমেও ১০ জন জোৱান নিহত হৈছে। দুৰ্ঘটনাটোত আন কমেও ৭ জন আহত হয়।

বৃহস্পতিবাৰে সেনা জোৱান কঢ়িয়াই অনা এখন বাহন পথৰ পৰা পিছলি গৈ এটা খাৱৈত পৰি যায়। ভাদেৰৱাহ-চাম্বা আন্তঃৰাজ্যিক ঘাইপথৰ খান্নী টপত ১৭ জন জোৱান কঢ়িয়াই অনা গাড়ীখনে উচ্চ উচ্চতাৰ দিশে গৈ থকা অৱস্থাত চালকজনে নিয়ন্ত্ৰণ হেৰুৱাই গাড়ীখন ২০০ ফুট দ খাৱৈত পৰি যায়।

দুৰ্ঘটনাটোৰ বিষয়ে অৱগত কৰি সামৰিক বিষয়াসকলে জনোৱা মতে, বৃহস্পতিবাৰে ১৭ জন জোৱান কঢ়িয়াই অনা এখন সামৰিক বাহন এটা উচ্চতাত থকা পোষ্টৰ দিশে গৈ থকা অৱস্থাত বুলেটপ্ৰুফ বাহনখন পথৰ পৰা পিছলি গৈ ডোডাৰ ভাদেৰৱাহ-চাম্বা আন্তঃৰাজ্যিক ঘাইপথৰ খান্নী টপৰ সমীপৰ ২০০ ফুট দ খাৱৈত পৰি যায়। এই দুৰ্ঘটনাত দহজন জোৱান নিহত হোৱাৰ বিপৰীতে আন একাংশ জোৱান গুৰুতৰভাৱে আহত হয়।

দুৰ্ঘটনাৰ খবৰ পোৱাৰ লগে লগে সেনা-আৰক্ষীৰ যৌথ দলে ক্ষিপ্ৰতাৰে উদ্ধাৰ অভিযান আৰম্ভ কৰে। স্থানীয় বাসিন্দাসকলেও সেই স্থানত উপস্থিত হৈ আৰক্ষী আৰু উদ্ধাৰকাৰী দলক সহায় কৰে।

উদ্ধাৰ অভিযানত ১০ জোৱানৰ মৃতদেহ উদ্ধাৰ কৰা হয়। আহত জোৱান কেইজনক উদ্ধাৰ কৰাৰ লগতে কেইবাজনো জোৱানৰ অৱস্থা সংকটজনক বুলি জানিব পৰা গৈছে। তিনিজনক বিমানযোগে উধামপুৰৰ কমাণ্ড হাস্পতাললৈ প্ৰেৰণ কৰা হয়, য’ত তেওঁলোকে বিশেষ চিকিৎসা গ্ৰহণ কৰি আছে।

সেনাই এক বিবৃতিত কয় যে দুৰ্ঘটনাটোৰ তদন্ত আৰম্ভ কৰা হৈছে আৰু আহত জোৱানসকলক সম্ভৱপৰ উন্নত চিকিৎসা প্ৰদান কৰা হৈছে। মৃত জোৱান কেইজনৰ পৰিয়ালক অৱগত কৰা হৈছে।