পিকআপ ভ্যান আৰু এছ ইউ ভিৰ মাজত মুখামুখি সংঘৰ্ষ; ১২ জন নিহত, গুৰুতৰভাৱে আহত ২০ জন

এখন পিকআপ ভ্যান আৰু এখন এছ ইউ ভিৰ মাজত মুখামুখি সংঘৰ্ষত নিহত হয় ১২ জন শ্ৰমিক। গুৰুতৰভাৱে আহত হৈছে কমেও ২০জন লোক। মধ্য প্ৰদেশৰ ধৰ জিলাত বুধবাৰে নিশা সংঘটিত হয় এই দুৰ্ঘটনা।

আৰক্ষীয়ে জনোৱা মতে, বাগাড অঞ্চলৰ পৰা প্ৰায় ৩৫ জন শ্ৰমিকে ধৰ জিলালৈ উভতি আহিছিল। তীব্ৰ বেগেৰে চলি আছিল পিকআপ ভ্যানখন। চিকলিয়া ক্ৰছিঙত পেট্ৰ’ল পাম্পৰ সমীপত হঠাৎ নিয়ন্ত্ৰণ হেৰুৱালে চালকজনে। সেই সময়ত ৰাস্তাৰ বিপৰীত ফালৰ পৰা এখন এছ ইউ ভি আহি আছিল। বাহনখনত খুন্দা মৰাৰ পিছত বাগৰি পৰে গাড়ীখন।

প্ৰচণ্ড শব্দ শুনি স্থানীয় ৰাইজে ততাতৈয়াকৈ সেই স্থানত উপস্থিত হয়। তেওঁলোকে উদ্ধাৰ কাম আৰম্ভ কৰে। কিছু সময়ৰ ভিতৰতে আৰক্ষী আৰু অগ্নিনিৰ্বাপক বাহিনী সেই স্থানত উপস্থিত হয়।

জানিব পৰা মতে, থিতাতে ১২ জন লোকৰ মৃত্যু হয়। আহতসকলক স্থানীয় চিকিৎসালয়ত ভৰ্তি কৰোৱা হৈছে। তাত চিকিৎসাধীন হৈ আছে। কিছুমানৰ অৱস্থা সংকটজনক হোৱাৰ বাবে ইন্দোৰলৈ স্থানান্তৰ কৰা হয়।

দুৰ্ঘটনাৰ খবৰ পোৱাৰ পিছতে ধৰ জিলাৰ উপায়ুক্ত অভিষেক চৌধুৰীয়ে সেই স্থানত উপস্থিত হয়। তেওঁ কয়, “মূলতঃ অভাৰলোডিঙৰ বাবেই দুৰ্ঘটনাটো সংঘটিত হোৱা বুলি অনুমান কৰা হৈছে। তদন্ত চলি আছে।” ইতিমধ্যে অসাৱধানতাৰে গাড়ী চলোৱাৰ গোচৰ ৰুজু হোৱাৰ লগতে ঘটনা সন্দৰ্ভত তদন্ত আৰম্ভ কৰা হৈছে বুলিও তেওঁ কয়।

চিকিৎসালয়ৰ চিকিৎসক ছত্ৰপাল সিং চৌহানে কয় যে, “পিকআপ ভ্যানত প্ৰায় ৩৫ জন লোক আছিল। আটাইকেইজনক চিকিৎসালয়লৈ অনা হৈছে। ১০ৰ পৰা ১৫জন লোকৰ মৃত্যু হৈছে। ৮ৰ পৰা ১০জন লোকৰ অৱস্থা অতি গুৰুতৰ।”

 এই ঘটনাক লৈ শোক প্ৰকাশ কৰে প্ৰধানমন্ত্ৰী নৰেন্দ্ৰ মোদীয়ে। তেওঁ মৃতকৰ পৰিয়াললৈ ২ লাখ টকাকৈ আৰু আহতসকলক ৫০ হাজাৰ টকাকৈ আৰ্থিক সাহায্য প্ৰদান কৰাৰ কথা ঘোষণা কৰে।