কংগোত গীৰ্জাত প্ৰাৰ্থনাৰ সময়তে সন্ত্ৰাসবাদীৰ আক্ৰমণ; ১৪ জন লোকৰ মৃত্যু
মধ্য আফ্ৰিকাৰ দেশ কংগোৰ গীৰ্জাত সন্ত্ৰাসবাদী আক্ৰমণৰ ঘটনা ঘটিছে। এই ঘটনাত কমেও ১৪ জন লোকৰ মৃত্যু হয়। এই ঘটনা যোৱা দেওবাৰে দেশৰ পূব প্ৰান্তত অৱস্থিত এটা গীৰ্জাত সংঘটিত হৈছে।
ঘটনাৰ সময়ত বহু লোকে গীৰ্জাত প্ৰাৰ্থনা কৰি আছিল। অৱশ্যে আক্রমণকাৰীৰ একাংশও নিহতসকলৰ ভিতৰত আছে৷
সংবাদ মাধ্যমৰ বাতৰি অনুসৰি পূব কংগোত দেশখনৰ সেনা আৰু ৰাষ্ট্ৰসংঘৰ শান্তিৰক্ষী বাহিনীৰ হস্তক্ষেপ বৃদ্ধি পোৱাৰ পাছতো বছৰ বছৰ ধৰি ধাৰাবাহিক হিংসাত্মক পৰিস্থিতিৰ মাজত আছে আৰু দেওবাৰৰ এই আক্ৰমণ আৰু মৃত্যু সেই ধাৰাবাহিক অস্থিৰতাৰ শেহতীয়া ঘটনা।
কংগোৰ পূব প্ৰদেশ ইটুৰিৰ এটা গীৰ্জাত প্ৰাৰ্থনা কৰি থকা উপাসকসকলক সন্ত্ৰাসবাদীয়ে আক্ৰমণ কৰাৰ ফলত কমেও ১৪ জন লোক নিহত হোৱা বুলি স্থানীয় বিষয়া আৰু নাগৰিক সমাজৰ এজন নেতাই সোমবাৰে জনায়।
ডজগু আঞ্চলিক প্ৰশাসক ৰুফিন মেপেলা আৰু নাগৰিক সমাজৰ নেতা ডিউডন ল’ছাই কয় যে এই আক্ৰমণৰ আঁৰত দ্য কোপাৰেটিভ ফৰ দ্য ডেভেলেপমেন্ট অফ কংগো (কোডেকো) গোট আছে।
দুয়োগৰাকী বিষয়াই জনোৱা মতে, নিহত ১৪ জনৰ ভিতৰত ৯ জন সাধাৰণ নাগৰিক, ৪ জন আক্ৰমণকাৰী আৰু এজন সেনা জোৱান আছে।