সিংঘু সীমান্তত কৃষকৰ প্ৰতিবাদস্থলীতে নৃশংস হত্যাকাণ্ড

সিংঘু সীমান্তত কৃষি আইনৰ বিৰুদ্ধে প্ৰতিবাদ অব্যাহত থকাৰ মুহূৰ্ততে আজি পুৱা প্ৰতিবাদস্থলীত সংঘটিত হৈছে এক নৃশংস হত্যাকাণ্ড।

শিখ সকলৰ পবিত্ৰ ধৰ্ম গ্ৰন্থ গুৰু গ্ৰন্থ চাহিবাক অপমান কৰাৰ অভিযোগত এজন লোকক নিৰ্মমভাৱে হত্যা কৰা হৈছিল। প্ৰতিবাদস্থলীত থকা নিহাং শিখসকলৰ এটা দলে এটা ভিডিঅ’ত এই হত্যাৰ দায়িত্ব স্বীকাৰ কৰিছে।

ভিডিঅ’ আৰু ফটোত বন্দী হোৱা ঘটনাটোত দেখিবলৈ পোৱা গৈছে যে এজন ব্যক্তক ওলোটাকৈ আৰক্ষীৰ বেৰিকেডত বান্ধি তেওঁৰ মণিবন্ধ কাটি পেলোৱা হৈছিল আৰু তেওঁৰ ভৰি ভাঙিপেলোৱা হৈছিল।

আৰক্ষীৰ প্ৰাথমিক অনুসন্ধানত দেখা গৈছে যে নিহাং শিখৰ এটা গোটে শিখসকলৰ পবিত্ৰ গ্ৰন্থখনক অসন্মান কৰাৰ সন্দেহত তেওঁক হত্যা কৰাৰ অভিযোগ উত্থাপিত হৈছে।

হত্যাকাণ্ডত নিহত হোৱা ব্যক্তিজনক পঞ্জাৱৰ তৰণ জিলাৰ চিমা কলন গাঁৱৰ বাসিন্দা ৩৫ বছৰীয়া লখবীৰ সিং বুলি চিনাক্ত কৰা হৈছে। গাওঁপ্ৰধান অৱন কুমাৰ আৰু স্থানীয় DSP সুচা সিঙে তেওঁৰ পৰিচয় নিশ্চিত কৰিছে।

আৰক্ষীয়ে কয় যে তেওঁলোকে পুৱা প্ৰায় ৫ বজাত প্ৰতিবাদস্থলীৰ ওচৰত এজন লোকক বেৰিকেডত বান্ধি থোৱা অৱস্থাত পোৱা গৈছে বুলি খবৰ লাভ কৰিছিল আৰু তাৰ পিছতেই কুণ্ডলী আৰক্ষী থানাৰ এটা দল ঘটনাস্থলীত উপস্থিত হৈছিল।

সোনপতৰ আৰক্ষী অধীক্ষক জশনদীপ সিং ৰন্ধাৱাই কয়: “আঘাতপ্ৰাপ্ত ব্যক্তিজনক ততাতৈয়াকৈ অসামৰিক চিকিৎসালয়লৈ লৈ যোৱা হৈছিল। অৱশ্যে চিকিৎসালয়ত তেওঁক মৃত ঘোষণা কৰা হৈছিল। আমি অজ্ঞাত ব্যক্তিৰ বিৰুদ্ধে হত্যাৰ গোচৰ ৰুজু কৰিছো।”

এটা ভিডিঅ’ত আঘাতপ্ৰাপ্ত ব্যক্তিজনক তেজেৰে তুমুৰলি হৈ পৰি থকা দেখা যায়। তেওঁৰ এটা বাহু ৰচীত বান্ধি থোৱা আছে আৰু তেওঁৰ মুখৰ কাষত তেওঁৰ কটা বাওঁ হাত খন ওলমি আছে। ব্যক্তিজনৰ কাষত থিয় হৈ কেইবাজনো মানুহে তেওঁক প্ৰশ্ন কৰি আছে।

আন এটা ভিডিঅ’ত এজন ব্যক্তিয়ে দাবী কৰিছে যে পুৱা প্ৰায় ৩ বজাত ভুক্তভোগীগৰাকীক এজন স্বেচ্ছাসেৱকে প্ৰতিবাদস্থলীত গুৰুদ্বাৰা চাহিবৰ ওচৰত দেখা পাইছিল।

তেওঁৰ ভাষ্য অনুসৰি “অচিনাক্ত ব্যক্তিজনে গুৰু গ্ৰন্থ চাহিব গ্ৰন্থখন তুলি ল’বলৈ চেষ্টা কৰি আছিল। এজন স্বেচ্ছাসেৱকে তেওঁক দেখিলে। আমি তেওঁক ধৰি ছিলোঁ আৰু তেওঁক সুধিছিলো কোনে তেওঁক পঠিয়াইছিল।আমি তেওঁৰ ভৰি ভাঙিছিলোঁ আৰু তেওঁৰ হাত কাটি পেলাইছিলো। তেওঁক এতিয়া ইয়াত বান্ধি ৰখা হৈছে। যিয়ে তেওঁক পঠিয়াইছে তেওঁ এতিয়া ইয়ালৈ আহিব পাৰে। আমি তাক হত্যা কৰিম। তেওঁ পবিত্ৰ গ্ৰন্থখনক অসন্মান কৰিছে। আৰক্ষীয়ে তেওঁলোকৰ নিজা অনুসন্ধান কৰিব পাৰে।”

স্থানীয় লোক আৰু গাওঁপ্ৰধানৰ মতে নিহত সিঙে তেওঁৰ ভগ্নীৰ সৈতে বাস কৰিছিল।তেওঁলোকে কয় যে তেওঁলোকে তেওঁক শেষবাৰৰ বাবে মঙলবাৰে গাওঁখনত দেখিছিল।

DSP সুচা সিঙে জনোৱা মতে সিংঘুলৈ যোৱা তেওঁ গাওঁখনৰ একমাত্ৰ ব্যক্তি আছিল।