অনিল বৰগোহাঁইক আক্ৰমণ : প্ৰদান বৰুৱা-ৰণোজ পেগুলৈ সন্দেহৰ আঙুলি

লখিমপুৰ লোকসভা সমষ্টিৰ কংগ্ৰেছ প্ৰাৰ্থী অনিল বৰগোহাঁইক শুকুৰবাৰে দুৰ্বৃত্তই আক্ৰমণ কৰা ঘটনাৰ পাছত উত্তপ্ত হৈ আছে সমষ্টিটোৰ ৰাজনৈতিক পৰিৱেশ। নিৰ্বাচনী প্ৰচাৰৰ বাবে যোৱা প্ৰাৰ্থীজনক একাধিক স্থানত আক্ৰমণ কৰা ঘটনাৰ পাছত সন্দেহৰ আৱৰ্তত সোমাইছে বিজেপি।

অসম প্ৰদেশ কংগ্ৰেছে এই ঘটনাৰ আঁৰত লখিমপুৰৰ বিজেপি সাংসদ তথা এইবাৰৰো প্ৰাৰ্থী প্ৰদান বৰুৱা আৰু ধেমাজিৰ বিজেপি বিধায়ক ৰণোজ পেগু থকাৰ সন্দেহ প্ৰকাশ কৰিছে।

শনিবাৰে গুৱাহাটীৰ ৰাজীৱ ভৱনত এখন সংবাদমেল সম্বোধন কৰি প্ৰদেশ কংগ্ৰেছৰ জ্যেষ্ঠ মুখপাত্ৰ দূৰ্গা দাস বড়োৱে এই সন্দেহ প্ৰকাশ কৰাৰ লগতে প্ৰদান বৰুৱা আৰু ৰণোজ পেগুক আৰক্ষীয়ে জিম্মাত ল’ব লাগে বুলিও দাবী কৰে।

তেওঁ লগতে কংগ্ৰেছে অনিল বৰগোহাঁইৰ দৰে এজন শক্তিশালী প্ৰাৰ্থী দিয়া বাবেই বিজেপি মিত্ৰজোঁটে শংকিত হৈ এনে কাৰ্য সংঘটিত কৰা বুলিও মন্তব্য কৰে।

“সবকা সাথ সবকা বিকাশ”ৰ কথা কোৱা বিজেপিয়ে দেশত যদি ইমানেই বিকাশ কৰিছে তেনেহ’লে তেওঁলোকৰ লগতে মিত্ৰদলে দুৰ্বৃত্তৰ ভাও লৈ এঠাইত নহয়, সাত ঠাইতকৈও অধিক স্থানত আমাৰ প্ৰাৰ্থীৰ ওপৰত আৰু দলীয় সভাত গুণ্ডাগিৰি আৰম্ভ কৰিছে। তেওঁলোকে কেইবাটাও ৰাজনৈতিক দল লগ লাগি নিৰ্বাচনত অৱতীৰ্ণ হোৱাৰ পাছতো ভয় খাইছে নেকি?”, মুখপাত্ৰ দুৰ্গা দাস বড়োৱে কয়।

কংগ্ৰেছ প্ৰাৰ্থী অনিল বৰগোহাঁইক আক্ৰমণেই নহয়, দুৰ্বৃত্তই বিভিন্ন স্থানত কংগ্ৰেছৰ নিৰ্বাচনী কাৰ্য্যালয়, সভা-সমিতিৰ স্থান আদিতো শিলগুটি নিক্ষেপ আৰু লণ্ডভণ্ড কৰা কাৰ্য্যও সংঘটিত কৰা বুলি অভিযোগ কৰে দলটোৱে।

ইপিনে, এই ঘটনাৰ পাছতো আৰক্ষী প্ৰশাসনৰ ভূমিকাক লৈও অসন্তুষ্টি প্ৰকাশ কৰিছে প্ৰদেশ কংগ্ৰেছৰ মুখপাত্ৰজনে। আৰক্ষীয়ে এই ঘটনাসমূহৰ পাছত তাৎক্ষণিক ব্যৱস্থা গ্ৰহণ নকৰা বুলি মন্তব্য কৰাৰ লগতে আৰক্ষীৰ ভূমিকা নিৰপেক্ষ নহয় বুলিও কয়।

এই ঘটনা সন্দৰ্ভত ব্যৱস্থা গ্ৰহণৰ দাবী জনাই আজি কংগ্ৰেছে মুখ্য নিৰ্বাচনী বিষয়াক লিখিত আৱেদন প্ৰদান কৰিব বুলিও বড়োৱে জানিবলৈ দিয়ে।