অবৈধ সুৰাৰ বিৰুদ্ধে শ্ৰীমন্ত শংকৰদেৱ সংঘই অসমজুৰি চলাব সজাগতা অভিযান

ৰাজ্যৰ বৃহত্তম সুৰাজনিত অপঘটনাত ইজনৰ পিছত সিজন লোকৰ মৃত্যু অব্যাহত থকা তথা শতাধিক লোকৰ মৃত্যু হোৱাৰ পিছত এই সমগ্ৰ ঘটনাক লৈ উদ্বেগ প্ৰকাশ কৰিছে শ্ৰীমন্ত শংকৰ সংঘৰ পদাধিকাৰ কমলাকান্ত গগৈয়ে।

পদাধিকাৰ গৰাকীয়ে সাংবাদিকৰ আগত এই ঘটনাক লৈ কয় যে গোলাঘাট আৰু তিতাতবৰ জিলাৰ লগতে সমগ্ৰ অসমৰ চাহ বাগিচা অধ্যুষিত অঞ্চলত অবৈধ সুৰাৰ বিৰুদ্ধে শ্ৰীমন্ত শংকৰদেৱ সংঘই এক সজাগতা অভিযান চলাব।

সংঘৰ কেন্দ্ৰীয় সেৱা বাহিনীৰ উদ্যোগত গোটেই অসমজুৰি চাহ বাগিচা অধ্যুষিত অঞ্চলবিলাকত তেওঁলোকে অবৈধ সুৰাৰ বিৰুদ্ধে পৰ্যায়ক্ৰমে সজাগতা অভিযান চলাব বুলি পদাধিকাৰ কমলাকান্ত গগৈয়ে মন্তব্য কৰে।

উল্লেখযোগ্য বৰ্তমানলৈকে বিষাক্ত সুৰা সেৱনৰ ফলত যোৰহাট আৰু গোলাঘাট জিলাত শতাধিক লোকৰ মৃত্যু হৈছে। যি ঘটনাই সমগ্ৰ ৰাজ্যতে এক চাঞ্চল্যৰ সৃষ্টি কৰিছে। ইফালে আবকাৰী বিভাগে বৰ্তমান বিভিন্ন অঞ্চলত অবৈধ সুৰাৰ বিৰুদ্ধে অভিযান চলোৱাৰ লগতে ইয়াৰ লগত জড়িত লোকক আটক কৰিছে।