আৰম্ভ হ’ল অসম সাহিত্য সভাৰ নিৰ্বাচনী প্ৰক্ৰিয়া
আজিৰ পৰা আৰম্ভ হৈছে সাহিত্য সভাৰ নিৰ্বাচনী প্ৰক্ৰিয়া। এই নিৰ্বাচন অসম সাহিত্য সভাৰ সংবিধানৰ গণ্ডীৰ ভিতৰত হ’ব। আজি গুৱাহাটীৰ সাহিত্য সভা ভৱনত এখন সংবাদমেল সম্বোধন কৰি জ্যেষ্ঠ অধিবক্তা তথা সাহিত্য সভাৰ নিৰ্বাচনী বিষয়া বিজন মহাজনে এই কথা সদৰী কৰে।
আজিৰ পৰা নিৰ্বাচনৰ আচৰণ বিধি প্ৰয়োগ হ’ব বুলি উল্লেখ কৰি তেওঁ কয়, ‘পূৰ্বতে নিৰ্বাচন সাহিত্য সভাৰ নিয়মাৱলী ভিত্তিত হৈছিল। এইবাৰ প্ৰথম বাৰলৈ সংবিধানৰ ভিত্তিত নিৰ্বাচন অনুষ্ঠিত হ’ব’।
প্ৰাৰ্থীসকলে অহা ৩ আৰু ৪ অক্টোবৰত গুৱাহাটীস্থিত প্ৰশাসনীয় কাৰ্যালয়ত মনোনয়ন পত্ৰ দাখিল কৰিব লাগিব। মনোনয়ন দাখিলৰ সময়ত প্ৰাৰ্থীসকলে নিজৰ জীৱনপঞ্জী দাখিল কৰিব লাগিব। আনহাতে কোনোবাই “মনোনয়ন প্ৰত্যাহাৰ কৰিলে ৭ অক্টোবৰত কৰিব পাৰিব’ বুলি মহাজনে লগতে জনায়।
ভোটদান প্ৰক্ৰিয়া ১ নৱেম্বৰৰ পৰা ১০ ডিচেম্বৰলৈ চলিব বুলি য’ত জিলা আৰু শাখা সাহিত্য সভাসমূহে ডাকযোগে ভোটদান কৰিব লাগিব।
১৫ ডিচেম্বৰত ঘোষণা কৰা হ’ব নিৰ্বাচনৰ ফলাফল। মহাজনে আজি জনোৱা মতে উক্ত দিনা হোজাইত হ’ব লগা কাৰ্যনিৰ্বাহক সভাত ৰাইজ আৰু সংবাদমাধ্যমৰ উপস্থিতিত ভোট গণনা কৰা হ’ব।
আজিৰ পৰা কোনো প্ৰাৰ্থীয়ে প্ৰচাৰকাৰ্য চলাব নোৱাৰিব বুলি উল্লেখ কৰি প্ৰচাৰ চলোৱা প্ৰমাণিত হ’লে প্ৰাৰ্থিত্ব কৰ্তন হ’ব বুলি সংবাদমেলত তেওঁ জানিবলৈ দিয়ে।
নিৰ্বাচনী বিষয়া বিজন মহাজনে জনোৱা মতে ফলাফল ঘোষণাৰ এদিন পিছলৈ এই আচৰণবিধি বলৱৎ থাকিব।