আৰক্ষীয়ে জেৰাৰ বাবে থানালৈ অনা প্ৰাক্তন মন্ত্ৰী বাদল চৌধুৰী অসুস্থ; পুনৰ চিকিৎসালয়ত ভৰ্তি

ত্ৰিপুৰাৰ পূৰ্বৰ বাওঁ চৰকাৰখনৰ গড়কাপ্টানী মন্ত্ৰী বাদল চৌধুৰীক ত্ৰিপুৰা আৰক্ষীয়ে আজি জেৰাৰ বাবে পশ্চিম আৰক্ষী থানালৈ আনে যদিও তেওঁ অসুস্থ হৈ পৰাত পুনৰ জি বি চিকিৎসালয়ত ভৰ্তি কৰোৱা হৈছে।

পূৰ্বৰ বাওঁ চৰকাৰৰ দিনত বিভাগটোত হোৱা দুৰ্নীতিৰ অভিযোগত তেওঁৰ বিৰুদ্ধে গোচৰ ৰুজু হৈ আছে।

আদালতে আগতীয়া জামিন নাকচ কৰাৰ পিছত চৌধুৰীক যোৱা ২১ অক্টোবৰত জি বি হস্পিটেলতে গ্ৰেপ্তাৰ কৰিছিল আৰু তেওঁৰ চিকিৎসা আৰক্ষীৰ নিৰীক্ষণত চলি আছিল।

আজি প্ৰথমবাৰৰবাবে প্ৰাক্তন মন্ত্ৰীজনক আৰক্ষীয়ে জেৰাৰ বাবে থানালৈ আনিছিল। তেওঁক আজি আদালততো হাজিৰ কৰোৱাৰ কথা আছিল।

বিভাগটোত উক্ত সময়ছোৱাত প্ৰায় ৬০০ কোটি টকাৰ দুৰ্নীতি হোৱা বুলি অভিযোগ উত্থাপন হৈছে আৰু গোচৰটোত তদানীন্তন মুখ্য সচিব য়শপাল সিং আৰু বিভাগটোৰ মুখ্য অভিযন্তাকো সুনীল ভৌমিককো সামৰি লোৱা হৈছে।

ইয়াৰ পূৰ্বে চিকিৎসালয় কৰ্তৃপক্ষই উচ্চ ৰক্তচাপত ভোগা প্ৰাক্তন মন্ত্ৰীজনৰ স্বাস্থ্যৰ অৱস্থা অতি বেয়া বুলি জানিবলৈ দিছিল।

নিজৰ কাৰ্য্যকালত বিভাগটোত ব্যাপক দুৰ্নীতিৰ অভিযোগ উঠাৰ পিছত চৌধুৰীয়ে কৈছিল যে তেওঁ যিকোনো ধৰণৰ তদন্তৰ সন্মুখীন হ’বলৈ সাজু।

গড়কাপ্তানী বিভাগৰ প্ৰাথমিক পৰ্য্যৱক্ষণ আৰু তাৰ পৰৱৰ্তী অনুসন্ধানৰ ভিত্তিত চৌধুৰী, প্ৰাক্তন মুখ্য সচিব আৰু বিভাগটোৰ তদানীন্তন মুখ্য অভিযন্তাৰ বিৰুদ্ধে ভাৰতীয় দণ্ডবিধিৰ ধাৰা 409, 418, 420, 201, 120B আৰু দুৰ্নীতি প্ৰতিৰোধ আইনৰ ধাৰ 13-ৰ অধীনত গোচৰটো ৰুজু কৰা হৈছে।