কোভিড-১৯ত আক্রান্ত সাংসদ বদৰুদ্দিন আজমল আৰু ভাতৃ চিৰাজুদ্দিন আজমল
সাংসদ তথা এইআইয়ুডিএফৰ মুৰব্বী বদৰুদ্দিন আজমল আৰু তেওঁৰ ভাতৃ প্ৰাক্তন সাংসদ চিৰাজুদ্দিন আজমল কোভিড-১৯পজিটিভ বুলি খবৰ আহিছে।
এক সূত্ৰৰ পৰা লাভ কৰা হৈছে এই খবৰ।
শনিবাৰে তেওঁলোক দুজনৰ পজিটিভ আহে বুলি জানিব পৰা গৈছে।
বৰ্তমান মুম্বাইৰ এখন ব্যক্তিগত চিকিৎসালয়ত দুয়োগৰাকী চিকিৎসাধীন হৈ আছে।
দীৰ্ঘদিন ধৰি মধুমেহ ৰোগত আক্রান্ত আছিল ধুবুৰীৰ সাংসদ বদৰুদ্দিন আজমল। কিছুদিন ধৰি তেওঁৰ দেহত শৰ্কৰাৰ পৰিমাণ কমি গৈছিল।
সেয়েহে, কোভিড-১৯ৰ যুঁজখনত তেওঁ যুঁজিব পৰা নাই বুলি ফেচবুকযোগে সমষ্টিবাসীৰ আগত দুখ প্ৰকাশ কৰিছিল।
ইপিনে, বদৰুদ্দিন ভাতৃ তথা বৰপেটাৰ প্ৰাক্তন সাংসদ চিৰাজুদ্দিন আজমল অন্য কিবা বেমাৰত আক্ৰান্ত নেকি সেয়া জানিব পৰা হোৱা নাই।
অৱশ্যে, এ আই য়ু ডি এফৰ দলীয় নেতৃত্বই নিশ্চিত কৰা নাই এই খবৰ।
কিছু সময় পূৰ্বে বিজেপিৰ শদিয়াৰ বিধায়ক বলিন চেতিয়া কৰ’নাত আক্ৰান্ত হৈছিল।
যোৱা বৃহস্পতিবাৰে কংগ্ৰেছৰ প্ৰাক্তন সাংসদ সুস্মিতা দেব কৰ’নাত আক্ৰান্ত হৈছিল।
ৰাজ্যত বৰ্তমানলৈকে ১৫৫৩৬ গৰাকী লোক কৰ’নাত আক্ৰান্ত হোৱাৰ লগতে ৯৮৪৮ গৰাকী লোক কৰ’নামুক্ত হৈ ঘৰলৈ উভতিছে।
বৰ্তমানলৈকে ৰাজ্যখনত ৩৫ গৰাকী লোক কৰ’নাত আক্ৰান্ত হৈ মৃত্যুক আঁকোৱালি লৈছে।