বাংলাদেশ ক্ৰিকেট দলৰ অপেনিং বেটছমেন চইফ হাছান ক’ৰ’না প’জিটিভ

বাংলাদেশ ক্ৰিকেট দলৰ অপেনিং বেটছমেন চইফ হাছান আৰু সহযোগী প্ৰশিক্ষক নিক লিৰ শৰীৰত ক’ৰ’না ভাইৰাছৰ উপস্থিতি ধৰা পৰিছে।

বাংলাদেশ ক্ৰিকেট বোৰ্ডৰ তৰফৰ পৰা মঙলবাৰে এই কথা প্ৰকাশ কৰা হয়।

বাংলাদেশ ক্ৰিকেট দলৰ আগন্তুক শ্ৰীলংকা ভ্ৰমণৰ পূৰ্বে ১৭ গৰাকী ক্ৰিকেটাৰ আৰু সাত গৰাকী চাপোৰ্ট ষ্টাফক কৰা ক’ৰ’না পৰীক্ষাৰ পাছতে হাছান আৰু নিক ক’ৰ’না প’জিটিভ বুলি পৰীক্ষাত ধৰা পৰে।

ছেপ্তেম্বৰৰ ২৭ তাৰিখে বাংলাদেশ ক্ৰিকেট দলটো শ্ৰীলংকা অভিমুখে উৰা মাৰিব।

উল্লেখযোগ্য যে, ইয়াৰ পূৰ্বেও বহু কেইগৰাকী বাংলাদেশী ক্ৰিকেটাৰ ক’ৰ’না ভাইৰাছৰ দ্বাৰা সংক্ৰমিত হৈছিল যদিও চিকিৎসাৰ অন্তত সম্পুৰ্ণৰূপে সুস্থ হৈ উঠিছিল।

ক’ৰ’না মহামাৰীৰ পৰিপ্ৰেক্ষিতত দীৰ্ঘদিন আন্তঃৰাষ্ট্ৰীয় ক্ৰিকেটৰ পৰা আতৰি থকা বাংলাদেশ ক্ৰিকেট দলে শ্ৰীলংকাৰ বিৰুদ্ধে খেলিবলগীয়া শৃংখলাৰ যোগেৰে পুনৰ ক্ৰিকেটৰ পথাৰলৈ উভতি আহিব।