ক’ৰ’না আক্ৰান্ত সকলৰ কাৰণে অৰ্থ সংগ্ৰহৰ বাবে নিজৰ ক্ৰিকেট বেটৰ নিলাম কৰিব বাংলাদেশী ক্ৰিকেটাৰ মুছফিকুৰ ৰহিমে

বাংলাদেশৰ ক্ৰিকেটাৰ মুছফিকুৰ ৰহিমে আন্তঃৰাষ্ট্ৰীয় টেষ্ট ক্ৰিকেটত প্ৰথম দ্বিশতৰাণ অৰ্জন কৰা তেওৰ ক্ৰিকেট বেটখন নিলাম কৰিব বিচাৰিছে।

দেওবাৰে বাংলাদেশৰ উইকেটকীপাৰ বেটছমেন গৰাকীয়ে কোভিদ-১৯-ৰ বিৰুদ্ধে যুঁজাৰ বাবে অৰ্থ সংগ্ৰহৰ কাৰণে বেটৰ নিলাম কৰাৰ সিদ্ধান্ত গ্ৰহণ কৰিছে বুলি কয়।

২০১৩ চনত শ্ৰীলংকাৰ বিৰুদ্ধে ৰহিমে গালে ষ্টেডিয়ামত কেৰিয়াৰৰ প্ৰথমটো দ্বিশতৰাণ অৰ্জন কৰিছিল।

নিজৰ টেষ্ট কেৰিয়াৰৰ প্ৰথমটো দ্বিশতৰাণ অৰ্জন কৰা বেটৰ সৈতে ফটো টুইটাৰত আপলোড কৰি ৰহিমে লিখে, ‘‘টেষ্টৰ প্ৰথমটো দ্বিশতৰাণ অৰ্জন কৰা এই বেটখন মোৰ বাবে অতি মূল্যবান। মোৰ বহু স্মৃতি ইয়াৰ সৈতে জড়িত হৈ আছে যদিও দেশৰ কোভিদ-১৯ আক্ৰান্ত সকলৰ সহায়ৰ বাবে মই মোৰ বেটপাত নিলাম কৰিব বিচাৰো।’’

উল্লেখযোগ্য যে, বাংলাদেশত বৰ্তমানলৈ ২,৪৫৬ গৰাকী লোক ক’ৰ’না ভাইৰাছত আক্ৰান্ত হোৱাৰ বিপৰীতে ৯১ গৰাকী লোকৰ ক’ৰ’না ভাইৰাছৰ সংক্ৰমণৰ ফলত মৃত্যু হৈছে।

বিগত সপ্তাহত বাংলাদেশৰ তাৰকা অলৰাউণ্ডাৰ ছাকিবুল হাছানে তেওঁৰ সতীৰ্থ খেলুৱৈ সকলক নিজৰ নিজৰ কিছু সামগ্ৰী নিলাম কৰি কোভিদ-১৯-ৰ বিৰুদ্ধে যুদ্ধত চৰকাৰক সহায়ৰ বাবে আহ্বান কৰিছিল।