ভাৰততকৈ ২০ গুণ কম মূল্যত ক’ৰ’না টেষ্টটিং কিট উপলব্ধ হ’ব বাংলাদেশত!

যি সময়ত ভাৰত চৰকাৰে ব্যক্তিগতখণ্ডৰ পৰীক্ষাগাৰ সমূহত ক’ৰ’না ভাইৰাছৰ টেষ্টটিং কিটৰ মূল্য ৪,৫০০ টকা ধাৰ্য্য কৰিছে সেই সময়তে চুবুৰীয়া ৰাষ্ট্ৰ বাংলাদেশে ইয়াতকৈ প্ৰায় ২০গুণ কম দামতে উন্নত মানৰ এনে কিটৰ ব্যৱস্থা কৰিছে।

বাংলাদেশ চৰকাৰে কম মূল্যতে ক’ৰ’না টেষ্টিটিং কিট উৎপাদনৰ বাবে গণ স্বাস্থ্য কেন্দ্ৰ নামৰ এটা প্ৰতিষ্ঠানক অনুমোদন জনাইছে। গণ স্বাস্থ্য কেন্দ্ৰ হৈছে দেশখনৰ বিশেষকৈ গ্ৰামাঞ্চলত হস্পিতাল পৰিচালনা আৰু চিকিৎসা গৱেষণা সংক্ৰান্তীয় কামৰ লগত জড়িত এক ৰাজহুৱা স্বাস্থ্য সংস্থা।

কিটবিধ তৈয়াৰ কৰিবলৈ কেতবোৰ ৰাসায়নিক বিকাৰক বিদেশৰ পৰা আমদানি কৰাৰ প্ৰয়োজন হ’ব। এই ক্ষেত্ৰত কেচামালৰ আমদানি কৰিবলৈ বাংলাদেশৰ ডিৰেক্ট’ৰেট জেনেৰেল অৱ ড্ৰাগছ এডমিনিষ্ট্ৰেশ্যনে (DGDA) অনুমোদন জনাইছে।

তৈয়াৰ হৈ উঠাৰ পিছত বিশ্ব স্বাস্থ্য সংস্থাৰ অনুমোদনৰ বাবে গণ স্বাস্থ্য কেন্দ্ৰই কিটটো DGDA-ক জমা দিব।

অহা দুসপ্তাহৰ ভিতৰত পূৰ্ণমাত্ৰাত ইয়াৰ উৎপাদন আৰম্ভ হ’ব বুলি আশা কৰা হৈছে। গণ স্বাস্থ্য কেন্দ্ৰই জনোৱা মতে এটা কিটৰ দাম হ’ব ২৫০-৩০০ টাকা, অৰ্থাৎ ভাৰতীয় মূল্যত ২২৪-২৬৯  টকা।

‘ৰেপিড ব্লট-ডট’ (Rapid Blot-Dot) প্ৰযুক্তিৰে তৈয়াৰী এই কিটবিধে মাত্ৰ ১৫ মিনিটৰ ভিতৰতে ক’ৰ’না ভাইৰাছ ধৰা পেলাব পাৰিব বুলিও সংস্থাটোৱে দাবী কৰিছে।