বংগবন্ধুৰ এজন হত্যাকাৰী আব্দুল মাজেদক ফাঁচী; উৎসৱমুখৰ বাংলাদেশ
বংগবন্ধু শ্বেখ মুজিবুৰ ৰহমানৰ আৰু এগৰাকী হত্যাকাৰী আব্দুল মাজেদক ফাঁচী দিয়া হৈছে। শনিবাৰে নিশা ১২ বাজি ১ মিনিটত ঢাকা কেন্দ্ৰীয় কাৰাগাৰত মাজেদৰ ফাঁচীৰ নিৰ্দেশ কাৰ্যকৰী কৰা হয়।
বংগবন্ধুৰ হত্যাকাণ্ডৰ সৈতে জড়িত ১২জনক মৃত্যুদণ্ড বিহা হৈছিল আৰু ইয়াৰ ভিতৰত এতিয়ালৈ ৬জনৰ নিৰ্দেশ কাৰ্যকৰী কৰা হ’ল।
দেশখনত বংগবন্ধু মুজিবুৰ ৰহমানৰ জন্ম শতবৰ্ষ পালন কৰাৰ সময়তে এনেদৰে তেওঁৰ এগৰাকী হত্যাকাৰীক ফাঁচী দিয়া হ’ল। ইয়াৰ পাছতে বাংলাদেশত এক উৎসৱমুখৰ পৰিৱেশ দেখা যায়।
হত্যাকাৰী মাজেদৰ ফাঁচীৰ বাবে শনিবাৰে পুৱাৰে পৰা বাংলাদেশৰ ৰাজধানী ঢাকা চহৰত নিৰাপত্তা ব্যৱস্থা কটকটীয়া কৰি তোলা হৈছিল।
ঢাকা কেন্দ্ৰীয় কাৰাগাৰৰ চৌপাশে নিশ্ছিদ্ৰ সুৰক্ষা ব্যৱস্থা গঢ়ি তোলা হয়। ইয়াৰ পূৰ্বে শুকুৰবাৰে আব্দুল মাজেদৰ সৈতে নিয়ম অনুযায়ী পত্নীসহ পৰিয়ালৰ সদস্যসকলে সাক্ষাৎ কৰিছিল।
উল্লেখ্য যে ১৯৭৫চনৰ ১৫ আগষ্টত বংগবন্ধু শ্বেখ মুজিবুৰ ৰহমানক পৰিয়ালসহ হত্যা কৰা হৈছিল।
বাংলাদেসত জিয়াউৰ ৰহমানৰ শাসনকালত বংগবন্ধুৰ হত্যাকাৰীসকলৰ বিচাৰ প্ৰক্ৰিয়া বন্ধ কৰি তেওঁলোকক চৰকাৰী উচ্চ পদত নিয়োগ কৰা হৈছিল। শনিবাৰে ফাঁচী কাৰ্যকৰী হোৱা হত্যাকাৰী আব্দুল মাজেদো পুৰস্কৃত হৈছিল।
১৯৯৬চনত আৱামী লীগ ক্ষমতালৈ অহাৰ পাছত উক্ত হত্যাকাণ্ডৰ বিচাৰ প্ৰক্ৰিয়া আৰম্ভ কৰা হয়। ইয়াৰ পাছতে সেনাবাহিনীৰ উচ্চ পদত কাৰ্যনিৰ্বাহ কৰা আব্দুল মাজেদে আত্মগোপন কৰিছিল।
যোৱা মঙলবাৰে ঢাকাত আৰক্ষীৰ হাতত গ্ৰেপ্তাৰ হৈছিল আব্দুল মাজেদ।
বংগবন্ধুৰ হত্যাকাণ্ডত মুঠ ১২ জনৰ বিৰুদ্ধে দেশখনৰ সৰ্বোচ্চ আদালতে মৃত্যুদণ্ডৰ ৰায় দিছিল।
বিগত ২০১০ চনৰ ২৭ জানুৱাৰিত ইয়াৰে পাঁচজনৰ মৃত্যুদণ্ড কাৰ্যকৰী কৰা হয়। আনহাতে, পাঁচজন হত্যাকাৰী এতিয়াও পলাতক হৈ আছে। তদুপৰি, ২০০২চনত আন এজন অভিযুক্ত হত্যাকাৰীৰ পলাতক অৱস্থাতে জিম্বাবুৱেত মৃত্যু হয়।