কাচাৰত ২০ লাখতকৈ অধিক মূল্যৰ নিষিদ্ধকৃত ড্ৰাগছ জব্দ; ৪জনক আটক
কাচাৰ আৰক্ষীয়ে বৃহস্পতিবাৰে দুটা পৃথক অভিযান চলাই ২০ লাখতকৈ অধিক মূল্যৰ বৃহৎ পৰিমাণৰ নিষিদ্ধ ড্ৰাগছজাতীয় সামগ্ৰী জব্দ কৰিবলৈ সক্ষম হয়।
এক গোপন সূত্ৰৰ পম খেদি জিলাখনৰ উপ আৰক্ষী অধীক্ষক এ জে বৰুৱাৰ নেতৃত্বত আৰক্ষীৰ এটা শিলচৰৰ দাঁতিকাষৰিয়া কনকপুৰত এক অভিযান চলাই এই সংক্ৰান্তত দুজন ব্যক্তিক আটক কৰে।
আটকাধীন লোক দুজনৰ পৰা আৰক্ষীয়ে ১৮০ গ্ৰাম হেৰ’য়ীন পাউডাৰ উদ্ধাৰ কৰে। তেওঁলোকক বাপন উদ্দিন মজুমদাৰ আৰু ছাজনা বেগম লচকৰ বুলি চিনাক্ত কৰা হৈছে।
এগৰাকী আৰক্ষী বিষয়াই কয়, ‘আমি তেওঁলোকৰ কবলৰ পৰা ১৮০ গ্ৰাম হেৰয়ীন, ৪টা মোবাইল ফোন, নগদ ৮২০০ টকা আৰু এ এছ ১১ এন ৬২০৮ নম্বৰৰ এখন পালছাৰ বাইক উদ্ধাৰ কৰো।‘
আনহাতে কালি চলোৱা আন এক তালাচী অভিযানত ধলাই আৰক্ষীয়ে নাৰ্ক’টিক্স ড্ৰাগছভৰ্তি ২৫টা টেমাসহ দুজন ব্যক্তিক আটক কৰে।
আটকাধীন লোক দুজনক মণিপুৰৰ পাওনেইঙ্গাম চৌনটাক আৰু নেংখলহিং টুবই বুলি চিনাক্ত কৰা হৈছে।