ডা: দেবেন দত্তক হত্যাৰ প্ৰতিবাদত বৰপেটা চিকিৎসা মহাবিদ্যালয়ৰ ছাত্ৰ-ছাত্ৰীৰ শ্ৰেণী বৰ্জন

টীয়ক চাহ বাগিচাৰ হাস্পাতালৰ চিকিৎসক ডা: দেবেন দত্তক শনিবাৰে এচাম লোকে প্ৰহাৰ কৰি হত্যা কৰাৰ প্ৰতিবাদত বৰপেটাৰ ফখৰুদ্দিন আলি আহমেদ চিকিৎসা মহাবিদ্যালয় আৰু চিকিৎসালয়ৰ ছাত্র-ছাত্ৰীসকলে আজি শ্ৰেণী বৰ্জন কাৰ্যসূচী ৰূপায়ণ কৰে ৷

চিকিৎসা মহাবিদ্যালয়খনৰ ছাত্র-ছাত্ৰীসকলে ক’লা বেজ পৰিধান কৰি শ্ৰেণী বৰ্জন কাৰ্যসূচী ৰূপায়ণ কৰাৰ লগতে এই হত্যাকাণ্ডৰ সৈতে জড়িত অপৰাধীসকলক শাস্তি প্ৰদানৰ দাবী উত্থাপন কৰে ৷

উল্লেখযোগ্য যে যোৰহাটৰ টীয়ক চাহ বাগিচাত শনিবাৰে একাংশ শ্ৰমিকে জ্যেষ্ঠ চিকিৎসক গৰাকীক প্ৰহাৰ কৰাৰ ফলত চিকিৎসকগৰাকীৰ মৃত্যু হয়।

শ্ৰমিকৰ আক্ৰমণত গুৰুতৰভাৱে আহত চিকিৎসকজনে যোৰহাট চিকিৎসা মহাবিদ্যালয় হাস্পাতলত শেষ নিশ্বাস ত্যাগ কৰিছিল।

শ্ৰমিকসকলে ৭৩ বছৰীয়া আৱাসিক চিকিৎসক ড০ দেৱেন দত্তক কৰ্তব্যত অনুপস্থিত থকাৰ তথা টীয়ক চাহ বাগিচাৰ এগৰাকী অস্থায়ী শ্ৰমিকৰ মৃত্যুৰ বাবে দায়ী বুলি অভিযোগ তুলি নৃশংসভাৱে প্ৰহাৰ কৰিছিল।

উল্লেখযোগ্য যে ডা: দত্তই বহুদিন আগেয়ে অৱসৰ গ্ৰহণ কৰিছিল যদিও মানৱীয়তাৰ খাতিৰতে বাগিচাখনত সেৱা আগবঢ়াই আহিছিল।

তেওঁৰ ঘৰ আছিল টীয়কৰ পৰা মাত্ৰ কেই কিলোমিটাৰমান আঁতৰৰ জগদুৱাৰত।

জ্যেষ্ঠ চিকিৎসকগৰাকীৰ মৃত্যুৰ পাছত সৰ্বত্ৰ প্ৰতিক্ৰিয়াৰ সৃষ্টি হৈছে। ৰাজ্যখনৰ চিকিৎসকলেও এনে নৃশংস হত্যাকাণ্ডৰ প্ৰতিবাদত কৰ্মবিৰতি পালন কৰিছে।