নিৰ্বাচনী যুঁজৰ পৰা আঁতৰি থাকিব বৰপেটা লোকসভা সমষ্টিৰ সাংসদ ছিৰাজুদ্দিন

সমাগত লোকসভাৰ নিৰ্বাচনী যুজত অংশগ্ৰহণ নকৰে ৬ নং বৰপেটা লোকসভা সমষ্টিৰ বৰ্তমানৰ সাংসদ ছিৰাজুদ্দিন আজমলে। এক বিশেষ সূত্ৰৰ পৰা সাংসদ ছিৰাজুদ্দিন আজমলে সমাগত লোকসভা নিৰ্বাচনত অৱতীৰ্ণ নোহোৱাটো এক প্ৰকাৰ নিশ্চিত বুলি জানিব পৰা গৈছে।

স্বাস্থ্যজনিত কাৰণতে সাংসদ গৰাকীয়ে নিৰ্বাচনী যুঁজত ভাগ নলয় বুলি সূত্ৰটোৱে জনায় যদিও প্ৰকৃত কাৰণ জানিব পৰা হোৱা নাই। বৰ্তমানৰ সাংসদ গৰাকীৰ স্থানত এ আই ইউ ডি এফ দলৰ হৈ সমষ্টিতোত কোনে প্ৰতিদ্বন্দ্বিতা আগবঢ়াব সেয়া চূড়ান্ত হোৱা নাই যদিও এইক্ষেত্ৰত দলটোৰ প্ৰাক্তন বিধায়ক হাফিজ ৰফিকুল ইছলামৰ নাম শীৰ্ষত থকা বুলি জানিব পৰা গৈছে।

উল্লেখযোগ্য যে ২০১৪ বৰ্ষৰ লোকসভাৰ নিৰ্বাচনত এ আই ইউ ডি এফ দলৰ ছিৰাজুদ্দিন আজমলে ৩,৯৪,৭০২ টা ভোট পাই জয়ী হোৱাৰ বিপৰীতে বিজেপিৰ চন্দ্ৰমোহন পাটোৱাৰীয়ে ৩,৫২,৩৬১ টা ভোটেৰে দ্বিতীয় স্থানত থাকে। আনহাতে কংগ্ৰেছৰ ইছমাইল হুছেইনে ২,৭৭,৮০২টা ভোট পাই তৃতীয় স্থানতে সন্তুষ্ট থাকে।