সম্পাদনা কৰা ভিডিঅ’ৰ বাবে ট্ৰাম্পৰ ওচৰত ক্ষমা বিচাৰিলে বিবিচিয়েঃ অৱশ্যে ক্ষতিপূৰণ দিবলৈ অস্বীকাৰ
পেনোৰামাৰ এটা খণ্ডত প্ৰকাশ পোৱা বিভ্ৰান্তিকৰভাৱে সম্পাদিত ভাষণৰ বাবে বিবিচিয়ে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ওচৰত ক্ষমা বিচাৰিছে যদিও ক্ষতিপূৰণৰ দাবী নাকচ কৰি কয় যে মানহানিৰ দাবীৰ কোনো ভিত্তি নাই।
এক বিবৃতিত সম্প্ৰচাৰক কোম্পানীটোৱে কয় যে ইয়াৰ অধ্যক্ষ সমীৰ শ্বাহে হোৱাইট হাউছলৈ ব্যক্তিগত পত্ৰ প্ৰেৰণ কৰি স্পষ্ট কৰি দিছে যে তেওঁ আৰু নিগমে এই সম্পাদনাৰ বাবে ক্ষমা বিচাৰিছে।
বিবিচিয়ে এক বিবৃতিত কয় যে, ‘আমি মানি লওঁ যে আমাৰ সম্পাদনা কক্ষই অজানিতে এনে ধাৰণা সৃষ্টি কৰিছিল যে আমি ভাষণৰ বিভিন্ন বিন্দুৰ উদ্ধৃতিৰ পৰিৱৰ্তে ভাষণৰ একক অবিৰত অংশ দেখুৱাইছো, আৰু ইয়াৰ ফলত ৰাষ্ট্ৰপতি ট্ৰাম্পে হিংসাত্মক কাৰ্য্যৰ বাবে প্ৰত্যক্ষ আহ্বান জনোৱাৰ ভুল ধাৰণা এটাৰ সৃষ্টি হৈছিল।’
বিবিচিয়ে লগতে কয় যে তেওঁলোকৰ কোনো প্লেটফৰ্মতে তথ্যচিত্ৰখন পুনৰ সম্প্ৰচাৰ কৰাৰ কোনো পৰিকল্পনা নাই।
নিগমে কয় যে ভিডিঅ’ ক্লিপটো সম্পাদনা কৰাৰ ধৰণৰ বাবে বিবিচিয়ে আন্তৰিকতাৰে দুখ প্ৰকাশ কৰিছে যদিও মানহানিৰ দাবীৰ ভিত্তি আছে বুলি আমি একমত নহয়।
ট্ৰাম্পৰ অধিবক্তাই স্পষ্ট কৰি দিয়ে যে ২০২১ চনত তেওঁৰ সমৰ্থকসকলে কেপিটেলত আক্ৰমণ চলোৱাৰ দিনটোত বিবিচিয়ে দিয়া ভাষণৰ সম্পাদনাক লৈ এতিয়ালৈকে কোনো গোচৰ দাখিল কৰা হোৱা নাই। দেওবাৰে ট্ৰাম্পে সম্প্ৰচাৰকলৈ প্ৰেৰণ কৰা এখন পত্ৰৰ পিছতে তেওঁলোকৰ এই বিবৃতিৰ পিছতে আইনী ব্যৱস্থা গ্ৰহণৰ ভাবুকি আৰু ক্ষমা আৰু ক্ষতিপূৰণৰ দাবী জনায়।