কোহলী-শাস্ত্ৰীৰ সৈতে বি চি চি আই; পাঁচ দিনীয়া টেষ্ট ম্যেচ জীয়াই ৰখাৰ পক্ষত অৱস্থান

আই চি চিৰ ক্ৰিকেট সমিতিয়ে চাৰি দিনীয়া টেষ্টৰ বাবে আলোচনা কৰিব যদিও ভাৰতীয়া ক্ৰিকেট নিয়ন্ত্ৰণ বোৰ্ডে(বি চি চি আই) আই চি চিৰ সৈতে সহমত প্ৰকাশ কৰাৰ আশা ক্ষীণ।

ভাৰতীয় দলৰ অধিনায়ক বিৰাট কোহলী আৰু প্ৰশিক্ষক ৰবি শাস্ত্ৰীয়ে আই চি চিৰ চাৰিদিনীয়া টেষ্টৰ পৰিকল্পনাৰ প্ৰতি অসন্তষ্টি প্ৰকাশ কৰি ইয়াৰ বিপৰীতে স্থিতি গ্ৰহণ কৰিছিল।

আনহাতে, সৌৰভ গাংগুলী নেতৃত্বাধীন বি চি চি আইয়ে আই চি চিৰ পৰিৱৰ্তে ভাৰতীয় দলৰ অধিনায়ক আৰু প্ৰশিক্ষকৰ পক্ষহে গ্ৰহণ কৰিব বুলি জানিব পৰা গৈছে।

‘‘মই ক্ৰিকেটৰ পাৰম্পৰিক শৈলীক বজাই ৰখাটো বিচাৰো, মই কেতিয়াও টেষ্ট খেল পাঁচদিনৰ পৰিৱৰ্তে চাৰিদিনলৈ সলনি কৰি ইয়াৰ স্বকীয়তা হেৰুওৱাটো বিচৰা নায়,’’ ভাৰতীয় দলৰ অধিনায়ক কোহলীৰ মন্তব্য।

কোহলীয়ে টেষ্ট ক্ৰিকেটৰ স্বভাৱ সলনি কৰাতকৈ ইয়াক পাৰম্পৰিক ৰূপত অধিক জনপ্ৰিয় কেনেদৰে কৰিব পাৰি তাৰ ওপৰতহে গুৰুত্ব দিবৰ বাবে আহ্বান জনায়।

কোহলীয়ে ইয়াৰ উপৰিও আই চি চি টেষ্ট ৰেংকিঙৰ তলৰ ফালে স্থান লাভ কৰা দলসমূহৰ সৈতেও আই চি চিক কথা পতাৰ বাবে অনুৰোধ কৰে যাতে তেওঁলোকে ভালদৰে টেষ্ট ক্ৰিকেটক আগবঢ়াই নিবলৈ সক্ষম হয়।