পশ্চিম বংগতো “নিৰাপদ” নহয় দেশৰ প্ৰধান মন্ত্ৰী; ভ্ৰমণৰ প্ৰাকক্ষণত কলকাতাক দুৰ্গত পৰিণত

প্ৰতিবাদী অসমীয়াৰ ভয়ত অসম ভ্ৰমণ বাতিল কৰা প্ৰধান মন্ত্ৰী মোদীয়ে আজি কলকাতা ভ্ৰমণ কৰিব আৰু তাৰ বাবে মহানগৰখনক অভেদ্য দুৰ্গত পৰিণত কৰা দেখা গৈছে।

তেওঁ দুদিনীয়া ভ্ৰমণৰ সূচীৰে আবেলি ৪ বজাত তৃণমূল শাসিত ৰাজ্যখনৰ মহানগৰখনত উপস্থিত হ’ব।

প্ৰধান মন্ত্ৰী যাতে কোনো অপ্ৰীতিকৰ পৰিস্থিতিৰ সন্মুখীন হ’ব লগীয়া নহয়, তাৰ বাবে এছ পি জিয়ে বৃহৎ নিৰাপত্তা বেষ্টনী গঢ়ি তুলিছে।

অসমৰ দৰেই ৰাজ্যখনত CAA-বিৰোধী প্ৰতিবাদ তীব্ৰ ৰূপত অব্যাহত আছে আৰু প্ৰধান মন্ত্ৰী মোদীৰ ভ্ৰমণে ইয়াক নতুন মাত্ৰা দিব পাৰে বুলি ধাৰণা কৰা হৈছে।

ৰাজ্যখনত শাসনত থকা দলটো আৰু মুখ্য মন্ত্ৰীগৰাকীয়ে বিতৰ্কিত আইনখনৰ লগতে মোদী চৰকাৰে পৰিকল্পনা কৰা NRC-ৰ তীব্ৰ বিৰোধিতা কৰিছে।

তথ্য মতে, ইতিমধ্যে তৃণমূল কংগ্ৰেছৰ ছাত্ৰ সংগঠন, বাওঁ শিবিৰ আৰু কংগ্ৰেছে মোদীৰ সন্মুখত প্ৰতিবাদ কৰিবলৈ সকলো প্ৰকাৰে সাজু হৈ আছে।

স্থানীয় সংবাদ প্ৰতিষ্ঠানৰ খবৰ মতে, ভি আই পি পথৰ কৈখালীত এতিয়াও প্ৰতিবাদ সাব্যস্ত কৰি থকা হৈছে।

নিউজ এইটটীন নামৰ নিউজ প’ৰ্টেলটোৰ বাতৰিমতে, ৰাজভৱনৰ সন্মুখত প্ৰধান মন্ত্ৰী মোদীক ক’লা পতাকা দেখুওৱাৰ পৰিকল্পনা কৰিছে বাওঁ শিবিৰ আৰু কংগ্ৰেছে।

মোদীয়ে অসমত হৈ থকা CAA-বিৰোধী প্ৰতিবাদৰ বাবে খেল’ ইণ্ডিয়া ক্ৰীড়ানুষ্ঠানটো উদ্বোধন কৰিবলৈ অহাৰ পৰা বিৰত থাকিব লগীয়া হয়। অসমৰ প্ৰতিবাদৰ সন্মুখীন হোৱাৰ পৰা হাত সাৰিলেও পশ্চিম বংগত মোদী তীব্ৰ প্ৰতিবাদৰ সন্মুখীন হোৱাৰ পূৰ্ণ সম্ভাৱনা আছে।

যোৱা বছৰ অসমৰ মন্ত্ৰী হিমন্ত বিশ্ব শৰ্মাক আৰু তাৰ পিছত একাধিক বিজেপি নেতাক ৰাজ্যখনত অপদস্থ কৰা হৈছিল।

প্ৰধান মন্ত্ৰীজনে আজি সন্ধিয়া কলকাতাস্থিত হাওৰা ব্ৰিজৰ লাইট এণ্ড ছাউণ্ড শ্ব’ উদ্বোধন কৰিব। তাৰ পিছতে তেওঁ ৰামকৃষ্ণ মিশ্যনৰ হেড কোৱাৰ্টাৰলৈ যাব।

যোৱা বছৰ লোকসভা নিৰ্বাচনী প্ৰচাৰৰ বাবে অহাৰ পিছত এয়াই হ’ব মোদীৰ প্ৰথম পশ্চিম বংগ ভ্ৰমণ।