নিৰ্বাচনোত্তৰ হিংসাৰ বুজ ল’বলৈ আহি কোচবিহাৰত বিক্ষোভৰ সন্মুখীন পশ্চিমবংগৰ ৰাজ্যপাল ধনকড়

নিৰ্বাচনোত্তৰ হিংসাৰ বুজ ল’বলৈ আহি কোচবিহাৰত বৃহস্পতিবাৰে বিক্ষোভৰ সন্মুখীন হ’ব লগা হয় পশ্চিমবংগৰ ৰাজ্যপাল জগদীপ ধনকড়ে।

কোচবিহাৰৰ হিংসাগ্ৰস্ত অঞ্চল পৰিদৰ্শন কৰিবলৈ আহি উপস্থিত হৈছিল ৰাজ্যপালগৰাকীয়ে। তাতেই তেওঁক কেন্দ্ৰ কৰি প্ৰবল বিক্ষোভ প্ৰদৰ্শন কৰা হয়।

একাংশ লোকে ৰাজ্যপালগৰাকীক ক’লা পতাকা দেখুৱায় আৰু তেওঁৰ পথ অৱৰোধ কৰি বিক্ষোভ প্ৰদৰ্শন কৰে।

ৰাজ্যপালগৰাকীয়ে এই সমগ্ৰ ঘটনাৰ নিন্দা কৰিছে। তেওঁ কয় যে সাধাৰণ মানুহ জংঘলত বাস কৰিছে। গোটেই ৰাজ্যখনত আইন-শৃংখলা সম্পূৰ্ণ ভাঙি পৰিছে। ৰাজ্যপালক কেন্দ্ৰ কৰি লোকৰ বিক্ষোভ কোনোমতে মানি ল’ব নোৱাৰি।

ৰাজ্যপাল ধনকড়ে কয় যে ৰাজ্যখনত মানুহে আৰক্ষীৰ ওচৰলৈ যাবলৈ ভয় কৰে। তেওঁলোকৰ চকুত আৰক্ষীৰ প্ৰতি ভয় দেখা গৈছে। ঘৰ-বাৰী লুট কৰা হৈছে। এয়া কোন গণতন্ত্ৰৰ পৰিৱেশ।

বৃহস্পতিবাৰে কোচবিহাৰৰ দিনহাটাত ৰাজ্যপালক অৱৰোধ কৰি বিক্ষোভ প্ৰদৰ্শন কৰা হৈছিল।

মঙলবাৰে ৰাজ্যপাল ধনকড়ে বৃহস্পতিবাৰে নিৰ্বাচনোত্তৰ হিংসাত্মক পৰিস্থিতি পৰ্যবেক্ষণৰ বাবে যোৱাৰ কথা ছচিয়েল মিডিয়াত ব্যক্ত কৰিছিল। তেওঁ কোচবিহাৰৰ শীতলকুচি ভ্ৰমণ কৰাৰ কথাও সদৰী কৰিছিল।

ইয়াৰ পাছতে ৰাজ্যপালৰ এনে ভ্ৰমণে চৰকাৰী নিয়ম উলংঘা কৰিব বুলি মুখ্যমন্ত্ৰী মমতা বেনাৰ্জীয়ে ৰাজ্যপাল ধনকড়লৈ এখন পত্ৰ প্ৰেৰণ কৰিছিল।

অৱশেষত ৰাজ্যপালগৰাকীয়ে কোচবিহাৰ ভ্ৰমণলৈ অহাৰ পাছত একাংশ লোকৰ প্ৰবল বিক্ষোভৰ সন্মুখীন হ’বলগা হয়।