কাইলৈ পুনৰ ভাৰত বন্ধ; অসমত কেনেদৰে প্ৰভাৱ পৰিব?

অসমকে ধৰি দেশৰ আন চাৰিখন ৰাজ্যত বিধানসভা নিৰ্বাচনৰ তীব্ৰ প্ৰচাৰ চলি থকাৰ মাজতে কাইলৈ অৰ্থাৎ ২৬ মাৰ্চত পুনৰ ঘোষণা কৰা হৈছে ভাৰত বন্ধ।

এইবাৰ ভাৰত বন্ধৰ আহ্বান জনাইছে সংযুক্ত কিষাণ মৰ্চাই।

উল্লেখ্য যে যোৱা ২৬ ফেব্ৰুৱাৰীত কনফেডাৰেছন অৱ ইণ্ডিয়া ট্ৰেডাৰ্ছে আহ্বান ভাৰত বন্ধ আৰু চকা বন্ধ পালন কৰিছিল।

তিনিখনকৈ বিতৰ্কিত কৃষি আইন বাতিলৰ দাবীত দেশৰ বিভিন্ন প্ৰান্তৰ কৃষকে সুদীৰ্ঘ দিন দিল্লীৰ সীমান্তত আন্দোলন অব্যাহত ৰাখিছে যদিও চৰকাৰে কৃষকৰ আন্দোলনৰ প্ৰতি মুঠেও গুৰুত্ব দিয়া নাই।

চৰকাৰে কৃষকৰ দাবীক গুৰুত্ব নিদিয়াৰ প্ৰতিবাদতে সংযুক্ত কিষাণ মৰ্চাই অহা ২৬ মাৰ্চত ভাৰত বন্ধৰ আহ্বান জনাইছে।

শুকুৰবাৰে পুৱা ৬ বজাৰ পৰা সন্ধিয়া ৬ বজালৈ ভাৰত বন্ধৰ আহ্বান জনোৱা হৈছে। বন্ধৰ সময়ছোৱাত ৰাজহুৱা অনুষ্ঠান–প্ৰতিষ্ঠান, বজাৰৰ উপৰি দেশজুৰি ৰে’লৰ চলাচল বন্ধ থাকিব।

ভাৰত বন্ধৰ উপৰি ২৮ মাৰ্চত ‘হোলিকা দাহন’ৰ সময়ত দেশৰ বিভিন্ন প্ৰান্তত কৃষকসকলে বিতৰ্কিত কৃষি আইন কেইখনৰ প্ৰতিলিপি দাহ কৰিব বুলি জানিবলৈ দিছে।

উল্লেখ্য কৃষি আইন বাতিলৰ দাবীত কৃষক সংগঠন সমূহে ৬ ফেব্ৰুৱাৰীৰ দিনাও ৰাষ্ট্ৰজোৰা চকা বন্ধ কাৰ্যসূচী পালন কৰিছিল।

কৃষক নেতাসকলে জানিবলৈ দিয়ে যে কাইলৈ পুৱা ৬বজাৰ পৰা ১২ ঘন্টাৰ বাবে ভাৰত বন্ধ পালন কৰিবলৈ আহ্বান জনাইছে।

ইপিনে, অসমৰ বিধানসভা নিৰ্বাচনৰ  প্ৰথম পৰ্যায়ৰ ৪৭টা সমষ্টিৰ বাবে নিৰ্বাচনৰ ভোটগ্ৰহণ অহা ২৭ মাৰ্চত অনুষ্ঠিত হ’ব। ইয়াৰ এদিন পূৰ্বে দিয়া ভাৰত বন্ধৰ ফলত এই সমষ্টিসমূহ নিৰ্বাচনী প্ৰচাৰত বিশেষ প্ৰভাৱ নপৰে কিয়নো আজি প্ৰথম পৰ্যায়ৰ নিৰ্বাচনী প্ৰচাৰৰ অন্ত পৰিব।

অৱশ্যে ভোটদানৰ বাবে সমষ্টিসমূহলৈ যাবলগীয়া দূৰণিবটীয়া ভোটাৰসকলে যাতায়তৰ দিশত অসুবিধাৰ সন্মুখীন হোৱাৰ সম্ভাৱনা আছে।