উজনিত আলফা (স্বাঃ)ৰ বৃহৎ সদস্যভৰ্তি চক্ৰ উৎখাত, নাবালকসহ আটক চাৰি কেডাৰ

ভাৰতীয় সেনা আৰু অসম আৰক্ষীয়ে ২৪ ফেব্ৰুৱাৰিৰ পৰা অভিযান চলাই উজনিত আলফা (স্বাধীন)ৰ সদস্যভৰ্তিৰ এক বৃহৎ চক্ৰ উৎখাত কৰিছে।

তিনিচুকীয়া জিলাৰ কেইবাটাও স্থানত দুদিন দিনে-নিশাই চলা অভিযানটোত আলফা (স্বাঃ)ৰ চাৰিজন সদস্যৰ লগতে সংগঠনটোত নতুনকৈ যোগ দিয়া চাৰিজন নাবালককো আটক কৰা হৈছে।

আটক হোৱা আলফা (স্বাঃ) সদস্যকেইজনক দিগন্ত গগৈ ওৰফে দিগন্ত অসম, খগেন মৰাণ, ৰাণা সন্দিকৈ ওৰফে ককাই আৰু অভিজিত গগৈ বুলি চিনাক্ত কৰা হৈছে।

আলফা (স্বাঃ) সদস্যকেইজনক জিলাখনৰ মাকুম, ডিগবৈ আৰু কাকপথাৰ আদি কেইবাটাও স্থানত আটক কৰা হৈছে।

আলফা (স্বাঃ)ত ভৰ্তি হোৱাৰ বাবে যোৱা আটকাধীন নাবালককেইজনৰ নাম গোপনে ৰখা হৈছে।

অভিযানকালত আলফা (স্বাঃ) সদস্যকেইজনৰ পৰা দুটা ৭.৬৫ এম এম পিষ্টল, এটা .২২ পিষ্টল, কেইবাজাঁয়ো সক্ৰিয় গুলী, সংগঠনটোৰ তিনিখন পতাকা আৰু এজোৰ জোতা উদ্ধাৰ কৰা হৈছে।

সূত্ৰমতে আলফা (স্বাঃ)এ লিংকমেনৰ জৰিয়তে অসমৰ গাওঁসমূহৰ পৰা নতুন সদস্যভৰ্তিৰ চেষ্টা চলাই আছে।

নিষিদ্ধঘোষিত সংগঠনটোৰ সদস্যভৰ্তি চক্ৰ উৎখাত কৰা অভিযানটো শেহতীয়া সময়ত নিৰাপত্তা বাহিনীৰ এক বৃহৎ সফলতাৰূপে পৰিগণিত হৈছে।