বিহাৰ আয়কৰ বিভাগৰ অভিযান: পাঁচ চহৰত ওলাল ১০০ কোটিতকৈ অধিক হিচাপ বিহীন লেনদেনৰ হিচাপ

দেশত কেন্দ্ৰীয় তদন্ত সংস্থাসমূহে চলাই থকা নিৰন্তৰ অভিযানৰ সময়তে বিহাৰত আজি আয়কৰ বিভাগে অভিযান চলাই পাঁচখন চহৰত ১০০ কোটিতকৈ অধিক টকাৰ হিচাপ বিহীন লেনদেনৰ হিচাপৰ লগতে ১২ কোটি টকাৰ সোণ আৰু হীৰাৰ ষ্টক জব্দ কৰিছে।

কেন্দ্ৰীয় তদন্ত সংস্থাটোৱে ৰাজ্যখনত সোণ আৰু হীৰাৰ গহনা আৰু ৰিয়েল এষ্টেটৰ ব্যৱসায়ত নিয়োজিত কেইটামান গোটৰ ওপৰত অভিযান চলাইছিল।

বিত্ত মন্ত্ৰালয়ৰ এক বিবৃতি অনুসৰি পাটনা, ভাগলপুৰ, ডেহৰী-অন-ছ’ন, লক্ষ্ণৌ আৰু দিল্লীৰ মুঠ ৩০ টাতকৈও অধিক চৌহদত এই তালাচী চলোৱা হয়।

তালাচী অভিযানৰ সময়ত জব্দ কৰা হৈছে ৫ কোটিতকৈ অধিক মূল্যৰ হিচাপ বিহীন নগদ ধন আৰু গহনা। বিবৃতিটোত লগতে এতিয়ালৈকে এই অনুসন্ধানত ১০০ কোটি টকাতকৈও অধিক হিচাপ বিহীন লেনদেন ধৰা পৰিছে বুলি উল্লেখ কৰা হৈছে।

লগতে এই অভিযানত বৃহৎ সংখ্যক নথি-পত্ৰ আৰু আয় ফাঁকি প্ৰদৰ্শন কৰা ডিজিটেল প্ৰমাণ জব্দ কৰা হৈছে বুলি জানিবলৈ দিয়া হৈছে।

ইফালে সোণ আৰু হীৰাৰ গহনা ব্যৱসায়ত জড়িত এটা গোটে হিচাপ বিহীন আয়েৰে গহনা ক্ৰয়, দোকান আৰু স্থাৱৰ সম্পত্তিৰ ক্ৰয়ত বিনিয়োগ কৰাৰ ভুৱা হিচাপ প্ৰদৰ্শন কৰাৰ অভিযোগ উত্থাপিত হৈছে।

বিবৃতিটোত লগতে কোৱা হৈছে যে ৰিয়েল এষ্টেট ব্যৱসায়ত জড়িত আন এটা গোটৰ ক্ষেত্ৰত মাটি ক্ৰয়, অট্টালিকা নিৰ্মাণ আৰু এপাৰ্টমেণ্ট বিক্ৰীৰ ক্ষেত্ৰত হিচাপহীন নগদ লেনদেনৰ প্ৰমাণ পোৱা গৈছে আৰু জব্দ কৰা হৈছে।