বিহাৰৰ ভাৰত-নেপালৰ সীমান্তত ভাৰতৰ মথাউৰি নিৰ্মাণৰ কামত নেপালৰ বাধা

বিহাৰৰ ভাৰত-নেপাল সীমান্তত থকা নদী সমূহৰ মথাউৰি নিৰ্মাণৰ কামত নেপালে বাধা প্ৰদান কৰিছে বুলি বিহাৰৰ জলসম্পদ মন্ত্ৰী সঞ্জয় কুমাৰ ঝাই মন্তব্য কৰে।

নেপালৰ বাধাৰ বাবেই বৰ্তমান ভাৰত-নেপাল সীমান্তত মথাউৰি নিৰ্মাণৰ কাম বাধাগ্ৰস্ত হৈছে বুলি মন্ত্ৰী গৰাকীয়ে জানিবলৈ দিয়ে।

এই সন্দৰ্ভত ঝাই শীঘ্ৰেই ভাৰতৰ বৈদেশিক পৰিক্ৰমা মন্ত্ৰ্যালয়ৰ ওচৰ চাপিব বুলি লগতে কয়।

”যদি শীঘ্ৰেই এই মথাউৰি সমূহৰ নিৰ্মাণৰ কাম সম্পুৰ্ণ কৰিব পৰা নাযায় তেন্তে বাৰিষা বিহাৰৰ বিস্তৃৰ্ণ অঞ্চল বানপানীৰ কৱলত পৰিব,” জলসম্পদ মন্ত্ৰী গৰাকীয়ে জনায়।

উল্লেখযোগ্য যে, নেপালে বিগত সময়ছোৱাত ভাৰতৰ সৈতে থকা সকলো ধৰণৰ সু-সম্পৰ্ক ছেদ কৰাৰ বাবে উঠি-পৰি লাগিছে।

নেপালে ভাৰতৰ কালাপানী আৰু লিপুলেখক নিজৰ ভূ-খণ্ড বুলি দাবী কৰি অলপতে দেশৰ নতুন মানচিত্ৰ প্ৰকাশ কৰিছিল।

নেপালৰ এই পদক্ষেপৰ পাছতে ভাৰতে প্ৰতিক্ৰিয়া ব্যক্ত কৰি ইয়াৰ বিৰোধিতা কৰিছিল।

নেপালৰ প্ৰধান মন্ত্ৰী কে পি শৰ্মা অ’লিয়ে ক’ৰ’না ভাইৰাছৰ প্ৰসংগতো ভাৰতক সমালোচনা কৰি ভাৰতৰ পৰা উভতি যোৱা নেপালৰ ৮৫ শতাংশ লোকৰ দেহতে ক’ৰ’না ভাইৰাছৰ উপস্থিতি ধৰা পৰিছিল বুলি বিতৰ্কিত মন্তব্য প্ৰকাশ কৰিছিল।