পবিতৰাত গঁড়ৰ আক্ৰমণত নিহত বাইক আৰোহী : বন বিভাগৰ বিৰুদ্ধে বিস্ফোৰক অভিযোগ

দেওবাৰে পবিতৰা অভয়াৰণ্যত সংঘটিত হয় এক মৰ্মান্তিক ঘটনা। এটা প্ৰাপ্ত বয়স্ক গঁড়ৰ আক্ৰমণত থিতাতে নিহত হয় এজন বাইক আৰোহী।

জানিব পৰা মতে, মৃত লোকজনৰ নাম ছাদ্দাম হুছেইন। তেওঁৰ বয়স ৩১ বছৰ।

দেওবাৰে পুৱা ১০ মান বজাত পবিতৰা অভয়াৰণ্যৰ কাষতে থকা হাডুক বিলৰ কাষৰ পথটোৱেদি বাইক চলাই গৈ থকাৰ সময়ত হঠাতে জংঘলৰ পৰা ওলাই আহি এটা উন্মাদ গঁড়ে ছাদ্দাম হুছেইনক আক্ৰমণ কৰে।

গঁড়ৰ আক্ৰমণৰ পিছত হুছেইনে পলাবলৈ চেষ্টা কৰে যদিও মত্ত গঁড়টোৱে উপৰ্যুপৰি আক্ৰমণ কৰাত পলায়নৰ চেষ্টা বিফল হয় আৰু থিতাতে প্ৰাণ হেৰুৱায়।

স্থানীয় ৰাইজে জনোৱা মতে, আক্ৰমণৰ সময়ত স্থানীয় ৰাইজে ছাদ্দামক বচাবলৈ চেষ্টা কৰিছিল যদিও গঁড়টো অধিক আক্ৰমণাত্মক হৈ উঠাৰ বাবে কোনো প্ৰকাৰে ছাদ্দাম হুছেইনৰ প্ৰাণ ৰক্ষা কৰিব পৰা নগ’ল।

লগতে স্থানীয়ে ৰাইজে কৰা অভিযোগ অনুসৰি, পবিতৰাৰ বনাঞ্চলিক বিষয়াৰ কাৰ্যালয়ৰ দুশ মিটাৰ দূৰৈত সংঘটিত হৈছিল এই আক্ৰমণৰ ঘটনা। কিন্তু ওচৰতে থাকিও বন বিভাগৰ লোকে নাপালে গঁড়ৰ উপস্থিত কিম্বা আক্ৰমণৰ খবৰ। আনকি গঁড়ৰ আক্ৰমণৰ পিছত মৃতদেহ দুঘন্টা ধৰি পথৰ দাঁতিতে পৰি থাকিল যদিও বন বিভাগৰ লোক সেই স্থানত উপস্থিত নহ’লহি।

ইয়াৰ পিছতেই স্থানীয় ৰাইজে বন বিষয়া নয়নজ্যোতি দাস আৰু বন ৰক্ষী সকলৰ বিৰুদ্ধে প্ৰতিবাদ সাব্যস্ত কৰি তেওঁলোকৰ শাস্তি আৰু নিলম্বনৰ দাবী উত্থাপন কৰি পৰিস্থিতি উত্তাল কৰি তোলে। তাৰপিছত ঘটনাস্থলীত উপস্থিত হৈ জিলা আয়ুক্ত আৰু চক্ৰ বিষয়াই ৰাইজৰ দাবী মানি লোৱাৰ আশ্বাস প্ৰদান কৰে।

ইতিমধ্যে মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে। এই ভয়ানক আৰু মৰ্মান্তিক ঘটনাৰ পিছত দায়িত্বত থকা বন বিষয়াৰ বিৰুদ্ধে কি পদক্ষেপ গ্ৰহণ কৰে সেয়া হ’ব লক্ষনীয়। লগতে সেই অঞ্চলৰ ভৱিষ্যত নিৰাপত্তাৰ বাবেও কি ব্যৱস্থা কৰে সেয়া লক্ষনীয় হ’ব।