সাংবাদিকক কৰা আক্ৰমণৰ ঘটনাক গৰিহনা বিশ্বনাথ জিলা সাংবাদিক সন্থাৰ

ৰাজ্যত সাংবাদিক সকলৰ ওপৰত চলা ধাৰাবাহিক আক্ৰমনক লৈ সৰৱ হৈ পৰিল বিশ্বনাথ জিলা সাংবাদিক সন্থা। শেহতীয়াভাৱে চলিত ২৫ এপ্ৰিলৰ নিশা মুকালমুৱাৰ জ্যেষ্ঠ সাংবাদিক ৰাজেন ডেকাক যি অচিনাক্ত দুৰ্বৃত্তই বৰ্বৰ আক্ৰমণ কৰি হত্যাৰ চেষ্টা কৰিছিল সেইয়া অতিকৈ ঘৃণনীয় আৰু গৰিহনাৰ যোগ্য বুলি সন্থাই মন্তব্য কৰে।

আনহাতে যোৰহাট-লখিমপুৰ আদি অসমৰ বিভিন্ন ঠাইত গণতন্ত্ৰৰ চতুৰ্থ স্তম্ভক একাংশ দুৰ্বৃত্তই যি আক্ৰমণ কৰি ভীতিগ্ৰস্ত কৰিব বিচাৰিছে সেয়া চৰকাৰ তথা প্ৰশাসনে গুৰুত্ব সহকাৰে লৈ দুৰ্বৃত্তক অতি সোনকালে আটক কৰি আইনী শাস্তি বিহিবলৈও প্ৰশাসনৰ ওচৰত দাবী জনায়।

ইয়াৰ উপৰি সাংবাদিক সকলৰ জীৱনৰ প্ৰতি নিৰাপত্তা নিশ্চিত কৰাৰ দাবীৰে বিশ্বনাথ জিলা উপায়ুক্ত পৱিত্ৰ ৰাম খাউণ্ডৰ সৈতে বিশ্বনাথ জিলা সাংবাদিক সন্থাৰ বিষয়ববীয়া সকলৰ লগতো আজি গুৰুত্বপূৰ্ণ বৈঠক অনুষ্ঠিত হয়। বৈঠকৰ অন্তত বিশ্বনাথ জিলা সাংবাদিক সন্থাৰ জিলাৰ নেতৃবৃন্দই জিলা উপায়ুক্ত গৰাকীৰ জৰিয়তে অসমৰ মুখ্য মন্ত্ৰী সৰ্বানন্দ সোণোৱাললৈ এখন স্মাৰক পত্ৰ প্ৰেৰণ কৰে।

অনাগত দিনত সাংবাদিক সকলৰ জীৱনৰ প্ৰতি নিৰাপত্তা সুনিশ্চিত কৰাৰ লগতে এনে ধৰণৰ ঘটনাক লৈ প্ৰশাসনে যাতে উচিত ব্যৱস্থা গ্ৰহণ কৰে তাৰ বাবে আহ্বান জনাই বিশ্বনাথ জিলা সাংবাদিক সন্থাৰ সমূহ নেতৃবৃন্দ  তথা বিষয়ববীয়া সকলে।