বিজেপিৰ ৰাষ্ট্ৰীয় সভাপতি জে পি নাড্ডাৰ কনভয়ত ভয়ংকৰ আক্ৰমণ; কেইবাখনো গাড়ী ভাঙি চূৰমাৰ

পশ্চিমবংগৰ ডায়মণ্ড হাৰ্বাৰ যোৱাৰ পথত বিজেপিৰ ৰাষ্ট্ৰীয় সভাপতি জে পি নাড্ডাৰ গাড়ীত আক্ৰমণৰ ঘটনা  সংঘটিত হৈছে।

হঠাতে চলোৱা এই আক্ৰমণৰ ফলত নাড্ডাৰ কনভয়ৰ কেইবাখনো গাড়ীৰ গ্লাছ ভাঙি চূৰমাৰ হৈ গৈছে।

বাতৰি অনুসৰি, ৰাস্তাৰ দুয়োকাষৰ পৰা ইটা-শিল বৰ্ষণেৰে নাড্ডাক কনভয়ক লক্ষ্য কৰি আক্ৰমণ কৰা হয়।

ইটাৰে চলোৱা আক্ৰমণত বিজেপিৰ কেন্দ্ৰীয় নেতা কৈলাশবৰ্গীয়ৰ লগতে মুকুল ৰায়ৰ গাড়ীৰ গ্লাছো ভাঙিছে। আচম্বিতে চলোৱা এই আক্ৰমণৰ ফলত এজন বিজেপি কৰ্মীৰ মূৰ ফাটি গৈ আহত হৈছে।

অৱশ্যে, বুলেটপ্ৰুফ গাড়ীত বহি যোৱা বিজেপিৰ ৰাষ্ট্ৰীয় সভাপতি নাড্ডা এই আক্ৰমণত কোনোমতে ৰক্ষা পৰে।

পশ্চিমবংগ ভ্ৰমণলৈ অহা নাড্ডাৰ দ্বিতীয় দিনটোত বৃহস্পতিবাৰে ডায়মণ্ড হাৰ্বাৰত এখন সভাত যোগ দিবলৈ যোৱাৰ সময়তে সংঘটিত হৈছে এই আক্ৰমণৰ ঘটনা।