আনুষ্ঠানিক ঘোষণাহে বাকী : তেজপুৰ, নগাৱঁক বাদ দি বিজেপিৰ প্ৰাৰ্থী তালিকা চূড়ান্ত

প্ৰাথিত্ব প্ৰয়াসীৰ পৰম উৎকণ্ঠাৰ অন্ত পেলাই বিজেপিয়ে অসমৰ প্ৰতিদ্বন্দ্বিতা কৰিবলৈ ওলোৱা ১০টা সমষ্টিৰ ৮টাৰে প্ৰাৰ্থী চূড়ান্ত কৰিছে। তেজপুৰ আৰু নগাওঁ সমষ্টিৰ প্ৰাৰ্থী সন্দৰ্ভত এতিয়াও চূড়ান্ত সিদ্ধান্ত হোৱা নাই বুলি জানিব পৰা গৈছে।

তাৎপৰ্য্যপূৰ্ণভাৱে দলটোৰ বৰ্তমানৰ ৭জন সাংসদৰ মাত্ৰ ২জনহে এই তালিকাত স্থান পাবলৈ সক্ষম হৈছে। তেওঁলোক হৈছে ক্ৰমে লখিমপুৰ সমষ্টিৰ প্ৰদান বৰুৱা আৰু ডিব্ৰুগড় সমষ্টিৰ ৰামেশ্বৰ তেলী।

প্ৰাৰ্থিত্ব নোপোৱা ৫গৰাকী সাংসদ হ’ল ক্ৰমে যোৰহাট সমষ্টিৰ কামাখ্যা প্ৰসাদ তাছা, মঙলদৈৰ ৰমেন ডেকা, গুৱাহাটীৰ বিজয়া চক্ৰবৰ্তী তেজপুৰৰ ৰামপ্ৰসাদ শৰ্মা আৰু নগাৱঁৰ ৰাজেন গোহাঁই।

ইয়াৰ বিপৰীতে পূৰ্বতে সাংসদ হিচাপে কেতিয়াও প্ৰতিদ্বন্দিতা নকৰা নতুন মুখ দেখিবলৈ পোৱা গৈছে বিজেপিৰ প্ৰাৰ্থী তালিকাত।

হাই প্ৰফাইল গুৱাহাটী সমষ্টিত টিকট পাইছে গুৱাহাটী পৌৰ নিগমৰ প্ৰাক্তন মেয়ৰ তথা অগপৰ পৰা ২০১৪ চনত বিজেপিত যোগদান কৰা কুইন ওজাই।

এই পৰ্য্যন্ত প্ৰাৰ্থিত্ব নিশ্চিত হোৱা প্ৰাৰ্থীকেইজন-

১। গুৱাহাটী : কুইন ওজা (নতুন মুখ)

২। মঙলদৈ : দিলীপ শইকীয়া (ৰাজ্যিক বিজেপিৰ সাধাৰণ সম্পাদক, নতুন মুখ)

৩। লখিমপুৰ : প্ৰদান বৰুৱা (বৰ্তমানৰ সাংসদ)

৪। ডিব্ৰুগড় : ৰামেশ্বৰ তেলী (বৰ্তমানৰ সাংসদ)

৫। যোৰহাট : তপন গগৈ (বৰ্তমান ৰাজ্য চৰকাৰৰ মন্ত্ৰী)

৬। শিলচৰ : ৰাজদীপ ৰয় (নতুন মুখ)

৭। কৰিমগঞ্জ : কৃপানাথ মাল্লা (বিধানসভাৰ উপাধ্যক্ষ তথা ৰাতাবাৰীৰ বিজেপি বিধায়ক)

৮। স্বায়ত্ত শাসিত জিলা : হৰেন সিং বে’

নগাওঁ : অপেক্ষাৰত

তেজপুৰ : অপেক্ষাৰত

(প্ৰাৰ্থীৰ তালিকখনৰ এতিয়াও আনুষ্ঠানিক ঘোষণা বাকী আছে।)

শেহতীয়া খবৰ অনুসৰি নগাওঁ লোকসভা সমষ্টিত যৌন কেলেংকাৰিত অভিযুক্ত হৈ থকা বাবে সাংসদ ৰাজেন গোহাঁয়ে নিজেই প্ৰতিদ্বন্দ্বিতাৰ পৰা আঁতৰি থকা বাবে তেওঁৰ পত্নী ৰীতা গোহাঁইক টিকট দিয়াৰ কথা চৰ্চা হৈছে যদিও ৰীতা গোহাঁইৰ শিক্ষাগত অৰ্হতাক লৈ চিন্তিত বিজেপি নেতৃত্ব। ফলত সমষ্টিটোত এতিয়াও চূড়ান্ত কৰা নাই প্ৰাৰ্থী।

একেদৰে তেজপুৰত হিমন্ত বিশ্বৰ নাম চৰ্চাত আছিল যদিও হিমন্ত বিশ্বয়ো টিকট পোৱাটো নিশ্চিত হোৱা নাই। সাংসদ আৰ পি শৰ্মাই প্ৰধান মন্ত্ৰী মোদীলৈ প্ৰেৰণ কৰা পত্ৰই সমষ্টিটোৰ প্ৰাৰ্থী চূড়ান্ত কৰাত আওল লগোৱা বুলি জানিব পৰা গৈছে।

উল্লেখযোগ্য যে বিজেপিয়ে ইয়াৰ মিত্ৰ অগপক বৰপেটা, ধুবুৰী আৰু কলিয়াবৰৰ আসনকেইখন আৰু বি পি এফক কোকৰাঝাৰ সমষ্টি এৰি দিছে।