বিজেপি চৰকাৰক উচিত শিক্ষা দিয়াৰ এয়া সঠিক সময় : চি পি আই (এম) সাংসদ
বিজেপিয়ে ২০১৪ৰ সাধাৰণ নিৰ্বাচনৰ সময়ত এখন আইনৰ জৰিয়তে দেশৰ শ্ৰমিক সকলৰ মাহিলী আয় কমেও ১৮ হাজাৰ কৰাৰ যি প্ৰতিশ্ৰুতি দিছিল সেয়া চৰকাৰ অহাৰ পাছত হৈ নুঠিল বা আইন প্ৰণয়ণত সম্পূৰ্ণ ব্যৰ্থ হ’ল বিজেপি। এই মন্তব্য ত্ৰিপুৰাৰ চি পি আই (এম)ৰ সাংসদ শংকৰ প্ৰশাদ দত্তৰ।
আন্তঃৰাষ্ট্ৰীয় শ্ৰমিক দিৱস উপলক্ষে বুধবাৰে আগৰতলাত আয়োজিত এক অনুষ্ঠানত উপস্থিত থাকি সাংসদ গৰাকীয়ে জনসাধাৰণৰ আগত এই মন্তব্য কৰে।
বৰ্তমানৰ কেন্দ্ৰীয় নেতৃত্বাধীন বিজেপি চৰকাৰখনে শ্ৰমিক গোষ্ঠী, কৃষক শ্ৰেণীৰ লগতে যুৱ সমাজৰ হিতৰ বিৰুদ্ধে কাম কৰে বুলি মন্তব্য কৰি সাংসদ দত্তই কয় যে এই জনবিৰোধী চৰকাৰখনক এশিকনী দিয়াৰ বাবে দেশৰ সকলো লোক একগোট হোৱাৰ সঠিক সময় আহি পৰিছে।
আনহাতে একেটা অনুষ্ঠানতে উপস্থিত থকা ত্ৰিপুৰাৰ প্ৰাক্তন মুখ্য মন্ত্ৰী মানিক সৰকাৰে কয় যে পুনৰ বিজেপি চৰকাৰ শাসনত আহিলে ভাৰতৰ ভৱিষ্যত সুৰক্ষিত নহয়। বিজেপিয়ে সদায় জনবিৰোধী নীতিয়ে গ্ৰহণ কৰি আহিছে বুলিও প্ৰাক্তন মুখ্য মন্ত্ৰীগৰাকীয়ে মন্তব্য কৰে।
ইয়াৰ উপৰি ত্ৰিপুৰাত অলপতে অনুষ্ঠিত হৈ যোৱা লোকসভা নিৰ্বাচনৰ ভোটগ্ৰহণত বিজেপিয়ে ব্যাপক বিশৃংখলতাৰ লগতে ৰিগিং কৰা বুলি অভিযোগ উত্থাপন কৰি প্ৰাক্তন মুখ্য মন্ত্ৰীগৰাকীয়ে এই অন্যায়ৰ বিৰুদ্ধে একগোট হৈ মাত মাতিবলৈ সকলোকে আহ্বান জনায়।