বহিৰাগত নেতাৰ আমদানি : ৰামবিলাস পাছোৱানক অসমৰ পৰা ৰাজ্যসভালৈ পঠিয়াব বিজেপিয়ে!

অসমৰ পৰা ৰাজ্যসভালৈ স্থানীয় নেতাৰ পৰিৱৰ্তে এগৰাকী আমদানিকৃত নেতাক পঠিওৱাৰ পৰিকল্পনা কৰিছে বিজেপিয়ে। জানিব পৰা মতে বৰ্তমান কেন্দ্ৰীয় মন্ত্ৰী তথা এল জে পিৰ মুৰব্বী ৰামবিলাস পাছোৱানক অসমৰ পৰা ৰাজ্যসভালৈ নিৰ্বাচিত কৰি নিয়াৰ চিন্তা কৰিছে।

আগন্তুক লোক সভাৰ নিৰ্বাচনত বিহাৰত আসন ভাগ-বাটোৱাৰা সন্দৰ্ভত কিছুদিন পূৰ্বে দিল্লীত এল জে পি আৰু বিজেপি নেতৃত্বৰ মাজত অনুষ্ঠিত হোৱা এখন বৈঠকত বিজেপিৰ শীৰ্ষ নেতৃত্বই পাছোৱানক অসমৰ পৰা ৰাজ্য সভাৰ প্ৰতিনিধি হিচাপে নিৰ্বাচিত কৰি নিয়াৰ ইংগিত প্ৰদান কৰাৰ কথা জানিব পৰা গৈছে।

উল্লেখযোগ্য যে  অহা বছৰৰ এপ্ৰিল মাহত অসমৰ পৰা নিৰ্বাচিত ৰাজ্য সভাৰ সাংসদ ড০ মনমোহন সিং আৰু শান্তিয়াছ কুজুৰৰ কাৰ্যকালৰ অন্ত পৰিব। এই মুহূৰ্তত বিৰোধীৰ হাতত প্ৰৰ্থী জিকাব পৰা শক্তি নথকাৰ হেতুকে বিজেপিয়ে অনায়াসে নিজৰ প্ৰাৰ্থীক জয়ী কৰাবলৈ সক্ষম হ’ব। সেয়েহে আঠবাৰকৈ লোকসভাৰ সাংসদ নিৰ্বাচিত হোৱা পাছোৱানক অসমৰ পৰা জয়ী কৰি নিয়াত বিজেপিৰ কোনো জটিলতা নাই।

বিহাৰৰ ৰাজনীতিত বিজেপিয়ে স্থিতি দৃঢ় কৰি তোলাৰ লক্ষ্যেৰে পাছোৱানৰ দলৰ সৈতে সম্পৰ্ক মজবুত কৰি ৰখাৰ পক্ষে এৰা ধৰাৰ ৰাজনীতিত নামি পৰিছে। ইপিনে, কেন্দ্ৰীয় মন্ত্ৰী গৰাকীয়েও ৰাজ্য সভালৈ নিৰ্বাচিত হৈ অহাৰ ক্ষেত্ৰত সন্মতি প্ৰদান কৰা বুলি দলীয় সূত্ৰই প্ৰকাশ কৰিছে।

আনহাতে, পাছোৱানক অসমৰ পৰা ৰাজ্য সভাৰ সাংসদ হিচাপে নিৰ্বাচিত কৰি নিয়াৰ চিন্তা-চৰ্চাৰ কথা ৰাষ্ট্ৰীয় সংবাদ মাধ্যমত প্ৰকাশ পোৱাৰ পাছত স্বাভাৱিকতে ৰাজনৈতিক প্ৰতিক্ৰিয়াৰ সৃষ্টি হৈছে।

উল্লেখযোগ্য যে পূৰ্বতে কংগ্ৰেছে অসমৰ ৰাইজৰ বিৰোধিতাক উপেক্ষা কৰি বহিৰাগত নেতা সঞ্জয় সিঙক ৰাজ্য সভালৈ নিৰ্বাচিত কৰি নিছিল। তদুপৰি, কংগ্ৰেছে ড০ মনমোহন সিঙক পাঁচবাৰকৈ অসমৰ পৰা ৰাজ্য সভালৈ জয়ী কৰাই নিছিল। বিজেপিয়েও সেই একে পথকে অনুসৰণ কৰি বাহিৰৰ নেতা এজনক আমদানি কৰি ৰাজ্য সভালৈ নিৰ্বাচিত কৰি নিব বিচাৰিছে। যদি সেয়া হয়, এসময়ত কংগ্ৰেছক সমালোচনা কৰা বিজেপিৰ বাবেও এক অস্বস্তিকৰ পৰিস্থিতিয়ে অপেক্ষা কৰি থকাৰ কথা সহজেই অনুমান কৰিব পাৰি।