নিৰ্বাচন আয়োগক দিয়া শপতনামাত তথ্য লুকুৱালে বিজেপি নেতাই! বিৰোধীৰ অভিযোগত ব্যৱস্থা গ্ৰহণ নিৰ্বাচন আয়োগৰ 

লোকসভা নিৰ্বাচনৰ  পূৰ্বে নিৰ্বাচন আয়োগক দাখিল কৰা শপতনামাত তথ্য লুকুওৱাৰ অভিযোগ উত্থাপন হৈছে বিজেপিৰ কেন্দ্ৰীয় মন্ত্ৰী তথা তিৰুৱনন্তপুৰম সমষ্টিৰ লোকসভা সমষ্টিৰ প্ৰাৰ্থী ৰাজীৱ চন্দ্ৰশেখৰৰ বিৰুদ্ধে। 

সূত্ৰ অনুসৰি নিৰ্বাচনী শপতনামাত ৰাজীৱ চন্দ্ৰশেখৰে ২০২১-২২ বিত্তীয় বৰ্ষত দেখুৱাইছে মাত্ৰ ৬৮০ টকাৰ আয়। আনহাতে ২০২০-২১ বিত্তীয় বৰ্ষত তেওঁৰ আয় আছিল ১৭.৫ লাখ আৰু ২০২২-২৩ বিত্তীয় বৰ্ষত তেওঁৰ আয় আছিল ৫.৫০ লাখ টকা। যাৰ বাবেই বিতৰ্কৰ সৃষ্টি হৈছিল বিতৰ্কৰ।

তদুপৰি চন্দ্ৰশেখৰে শপতনামাত মুঠ সম্পত্তিৰ পৰিামাণ ২৮ কোটি টকা বুলি উল্লেখ কৰিছে। য’ত নগদ ধন, সমবায় সমিতি, বেংকত জমা ধন, বিভিন্ন শ্বেয়াৰ সকলো অন্তৰ্ভু্ক্ত হৈ আছে।

ইয়াৰ উপৰিও চন্দ্ৰশেখৰে বেংগালুৰুত প্ৰায় ১৪.৪০ কোটি টকাৰ অকৃষি ভূমি থকাৰ কথাও উল্লেখ কৰিছে।

এই বিতৰ্ক আৰু বিসংগতি পোহৰলৈ অহাৰ পিছত প্ৰথমে কংগ্ৰেছে চন্দ্ৰশেখৰৰ শপতনামাক লৈ অভিযোগ কৰে। তাৰপিছত চিপিআই(এম)ৰ নেতা তথা কেৰালাৰ মুখ্যমন্ত্ৰী পিনাৰায় বিজয়নে এই বিষয়ে অভিযোগ উত্থাপন কৰে। 

শপতনামাত সম্পত্তিৰ পৰিমাণৰ বিষয়ে ভুল তথ্য দিয়া কংগ্ৰেছে অভিযোগ উত্থাপন কৰাৰ পিছত নিৰ্বাচন আয়োগে কেন্দ্ৰীয় প্ৰত্যক্ষ কৰ ব’ৰ্ডক এই অনিয়মৰ তদন্তৰ দায়িত্ব প্ৰদান কৰে। যদি অভিযোগ প্ৰমাণিত হয় তেন্তে অভিযুক্ত প্ৰাৰ্থীক ছমাহৰ কাৰাদণ্ড বা জনপ্ৰতিনিধিত্ব আইন, ১৯৫১ৰ অধীনত জৰিমনা বিহা হ’ব পাৰে।

উল্লেখ্য যে উক্ত সমষ্টিটোৰ পৰাই প্ৰাৰ্থীত্ব আগবঢ়াইছে কংগ্ৰেছৰ জ্যেষ্ঠ নেতা শশী থাৰুৰে।

তেওঁৰ মুঠ স্থাৱৰ আৰু অস্থাৱৰ সম্পত্তিৰ পৰিমাণ ৫৫ কোটি টকা বুলি উল্লেখ কৰিছে।