মীৰাটৰ হত্যাকাণ্ডই সৃষ্টি কৰিছে চাঞ্চল্যৰ: গৰ্ভৱতী মহিলাসহ পুত্ৰৰ মৃতদেহ উদ্ধাৰ বিচনাৰ ভিতৰত

মীৰাটৰ হস্তিনাপুৰ অঞ্চলত সংঘটিত হোৱা এক হত্যাকাণ্ডই সৃষ্টি কৰিছে তীব্ৰ চাঞ্চল্যৰ। অঞ্চলটোৰ এটা বাসগৃহত বিচনাৰ ভিতৰত উদ্ধাৰ হৈছে এগৰাকী গৰ্ভৱতী মহিলা আৰু পুত্ৰৰ মৃতদেহ।

বেংকত কৰ্মৰত মহিলাগৰাকীৰ স্বামীয়ে ঘৰলৈ উভতি আহি দুৱাৰ খুলিবলৈ পত্নীক মাতে যদিও পত্নীৰ পৰা কোনো সঁহাৰি লাভ নকৰে। অলপ সময় অপেক্ষা কৰাৰ পিছত তেওঁ আৰক্ষীক খবৰ দিয়ে।

খবৰ পোৱাৰ পিছতে আৰক্ষীৰ এটা দল ঘটনাস্থলীত উপস্থিত হয়। আৰক্ষীয়ে ঘৰৰ দুৱাৰখন ভাঙি ভিতৰত প্ৰৱেশ কৰে আৰু ঘৰটোত সকলো সামগ্ৰী সিঁচৰতি হৈ থকা দেখিবলৈ পায়।

তাৰ পিছতে বিচাৰ-খোচাৰ কৰি আৰক্ষীৰ দলটোৱে কোঠাৰ এখন বিচনাৰ ভিতৰত মহিলাগৰাকী আৰু তেওঁৰ পুত্ৰৰ মৃতদেহ উদ্ধাৰ কৰে।

মৃতদেহ দুটা দেখা পাই আৰক্ষীয়ে মাতৃ-পুত্ৰক দুৰ্বৃত্তই ডিঙি চেঁপি হত্যা কৰা হৈছে বুলি সন্দেহ প্ৰকাশ কৰিছে।

ইতিমধ্যে দুয়োটা মৃতদেহ আৰক্ষীয়ে মৰণোত্তৰ পৰীক্ষাৰ বাবে প্ৰেৰণ কৰিছে। আনহাতে ঘটনা সন্দৰ্ভত তদন্ত আৰম্ভ কৰিছে বুলি স্থানীয় এজন আৰক্ষী বিষয়াই জানিবলৈ দিছে।