১৭বছৰীয়া প্ৰতীক্ষাৰ অন্ত; আজি প্ৰধান মন্ত্ৰী মোদীয়ে মুকলি কৰিব বগীবিল দলং
আজি পৱিত্ৰ বৰদিন তথা প্ৰাক্তন প্ৰধান মন্ত্ৰী অটল বিহাৰী বাজপেয়ীৰ জন্ম দিনটোতে ১৭বছৰীয়া অপেক্ষাৰ অন্ত পেলায় প্ৰধান মন্ত্ৰী নৰেন্দ্ৰ মোদীয়ে দেশবাসীৰ বাবে মুকলি কৰিব দেশৰ বৃহত্তম ৰে’ল-পথ দলং ‘বগীবিল’। ৫৫০০ কোটি টকা ব্যয়সাপেক্ষে নিৰ্মাণ কৰা ৪.৯৪ কিঃমিঃ দৈৰ্ঘ্যৰ এই বৃহৎ দলখনে ডিব্ৰুগড় আৰু ধেমাজি জিলা দুখনক সংযোগ কৰিব।
ইতিমধ্যে দলংখন উদ্বোধনৰ বাবে ধেমাজি জিলা প্ৰশাসনৰ লগতে ৰাজ্য চৰকাৰে সকলো প্ৰস্তুতি সম্পূৰ্ণ কৰি তুলিছে। প্ৰধান মন্ত্ৰী নৰেন্দ্ৰ মোদীৰ অনুষ্ঠানৰ বাবে নিৰাপত্তা ব্যৱস্থা অধিক কটকটীয়া কৰি তোলা পৰিলক্ষিত হৈছে।
উল্লেখ্য যে আজি দিনৰ ডেৰ বজাত ডিব্ৰুগড়ৰ মোহনবাৰী বিমানবন্দৰত উপস্থিত হ’ব প্ৰধান মন্ত্ৰী নৰেন্দ্ৰ মোদী। তাৰ পৰা পোনে পোনে হেলিকপ্টাৰেৰে উপস্থিত হ’ব বগীবিলত। বগীবিলত উপস্থিত হৈয়ে মোদীয়ে অসমবাসীলৈ উত্সৰ্গিত কৰিব বগীবিল দলং।
দলং উন্মোচনৰ পিছতে কাৰেং চাপৰিত অনুষ্ঠিত হ’বলগীয়া উদ্বোধনী সভাত জনতাক সম্বোধন কৰিব প্ৰধান মন্ত্ৰীয়ে। উদ্বোধনী অনুষ্ঠানত প্ৰায় ২.৫লাখ লোক সমবেত হ’ব বুলি প্ৰশাসনৰ লোকে ধাৰণা কৰিছে।
উল্লেখযোগ্য যে ১৯৯৭ চনতে দেশৰ তদানীন্তন প্ৰধান মন্ত্ৰী এইছ ডি দেৱেগৌড়ায়ে বগীবিল দলঙৰ আধাৰশিলা স্থাপন কৰিছিল আৰু ইয়াৰ ৫ বছৰৰ পিছত অৰ্থাৎ ২০০২ চনতহে ভূতপূৰ্ব প্ৰয়াত প্ৰধান মন্ত্ৰী অটল বিহাৰী বাজপায়ীয়ে দলংখনৰ নিৰ্মাণকাৰ্য আনুষ্ঠানিকভাৱে উদ্বোধন কৰে।
ইয়াৰ পিছতো দলংখন সম্পুৰ্ণ হৈ উঠাৰ বাবে ৰাজ্যবাসীয়ে ১৭ বছৰ অপেক্ষা কৰিবলগীয়া হ’ল।